Azərbaycanın qanunvericiliyinin beynəlxalq standartlara uyğunluğu 90–95 faiz səviyyəsində qiymətləndirilib. Qarşıda duran əsas vəzifələrdən biri mövcud mexanizmlərin tətbiqinin effektivliyini daha da artırmaqdır.
Bunu Maliyyə Monitorinqi Xidmətinin İdarə Heyətinin sədri Zaur Fətizadə Azərbaycan Mikromaliyyə Assosiasiyası (AMFA) İctimai Birliyinin təşkilatçılığı ilə Bakıda keçirilən 12-ci “Mikromaliyyədə İnvestisiya və Dayanıqlı İnkişaf” Konfransında bildirib.
O qeyd edib ki, Azərbaycanda maliyyə sektorunun inkişafı, ölkədaxili və beynəlxalq əməkdaşlığın gücləndirilməsi istiqamətində mühüm nəticələr əldə olunub. Həyata keçirilən tədbirlər nəticəsində ölkəmiz beynəlxalq qiymətləndirmə çərçivəsində 91 faiz nəticə göstərib.
Zaur Fətizadənin sözlərinə görə, mikromaliyyə sektoru maliyyə xidmətlərindən yetərincə istifadə edə bilməyən şəxslərin, özünüməşğul əhalinin və kiçik sahibkarların şəffaf maliyyə münasibətlərinə cəlb olunmasına şərait yaradır. Bu zaman xidmətlərin əlçatanlığı ilə yanaşı, təhlükəsizliyi və etibarlılığı da təmin edilməlidir.
Xidmət rəhbəri vurğulayıb ki, maliyyə inklüzivliyi ilə maliyyə təhlükəsizliyi arasında balans qorunmalıdır. Mikromaliyyə üzrə strateji çərçivə və maliyyə inklüzivliyi istiqamətində qəbul edilmiş sənədlər maliyyə xidmətlərinə çıxışın genişləndirilməsi üçün yeni imkanlar yaradır.
“İlk növbədə, sektorun təhlükəsizlik riskləri düzgün müəyyən olunmalı, maliyyə xidmətlərinin əlçatanlığı təmin edilməli və inklüzivlik sahəsindəki boşluqlar aradan qaldırılmalıdır. Sektor institutları arasında əməkdaşlıq gücləndirilməlidir”, – o bildirib.
Zaur Fətizadə cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizədə risk əsaslı yanaşmanın vacibliyini də qeyd edib. Onun sözlərinə görə, nəzarət tədbirləri risk səviyyəsinə uyğun tətbiq edilməli, şübhəli və yüksək riskli əməliyyatların aşkarlanmasına diqqət artırılmalıdır. Bu mexanizmlər qanuni iqtisadi fəaliyyətin və maliyyə xidmətlərinə çıxışın məhdudlaşdırılmasına səbəb olmamalıdır.
Çıxışda rəqəmsal transformasiyanın yaratdığı imkan və risklərə də toxunulub. Bildirilib ki, müasir analitik texnologiyalar riskləri daha sürətli aşkarlamağa imkan versə də, kibertəhlükəsizlik, məlumatların qorunması və texnoloji risklərin idarə edilməsi məsələlərinin aktuallığını artırır. Buna görə innovasiyalar adekvat nəzarət və təhlükəsizlik mexanizmləri ilə müşayiət olunmalıdır.
Zaur Fətizadə maliyyə sektorunun uzunmüddətli inkişafı və investisiya dayanıqlılığının təmin edilməsi üçün dövlət qurumları, maliyyə institutları və beynəlxalq tərəfdaşlar arasında əməkdaşlığın gücləndirilməsinin xüsusi əhəmiyyət daşıdığını vurğulayıb.