“PAŞA Bank” ənənəvi Maliyyə İnstitutları tədbirinin üçüncü buraxılışına ev sahibliyi edib. Tədbir “Sindikativ kreditlər, beynəlxalq maliyyə və inkişaf institutları vasitəsilə maliyyələşmə” mövzusuna həsr olunub.
GDP xəbər verir ki, bu barədə bankın baş maliyyə inzibatçısı Murad Süleymanov “LinkedIn” hesabında məlumat verib.
Onun sözlərinə görə, tədbir beynəlxalq tərəfdaşları, yerli müştəriləri və bankın komandasını bir araya gətirib. Görüşdə layihə həyata keçirən şirkətlərlə həmin layihələri maliyyələşdirə biləcək institutlar arasında müzakirələr aparılıb.
M.Süleymanov Azərbaycanın investisiya reytinqinə yüksəldiyini, qeyri-neft iqtisadiyyatının böyüdüyünü və şaxələndiyini qeyd edib. O bildirib ki, ölkə üçün əhəmiyyətli irimiqyaslı layihələrin maliyyələşdirilməsində ölkəyə, layihəyə və əməkdaşlığa inam mühüm rol oynayır.
Tədbirdə müştərilər öz layihələri haqqında təqdimatlar ediblər. M.Süleymanov aparılan müzakirələrin gələcəkdə konkret layihələrin maliyyələşdirilməsinə töhfə verəcəyinə inandığını vurğulayıb.








