PAŞA Bank 2025-ci ildə əldə etdiyi xalis mənfəətin 57,7%-ni — 107 milyon manatdan çox vəsaiti iki tranşla səhmdarlarına dividend şəklində ödəyir.
GDP xəbər verir ki, bu barədə bankın baş icraçı direktoru Cavid Quliyev “LinkedIn” hesabında məlumat verib.
Onun sözlərinə görə, ilk tranş üzrə 53,5 milyon manat iyul ayında ödənilib. Eyni məbləğdə ikinci tranşın ödənişi isə oktyabrın 30-da həyata keçiriləcək.
Beləliklə, təxminən dörd ay ərzində bir səhm üzrə ümumi dividend məbləği 5,72 manat təşkil edir. Cavid Quliyev fiziki şəxs olan səhmdarların dividend gəlirlərinin mövcud qanunvericiliyə əsasən gəlir vergisindən azad olduğunu bildirib.
Bank rəhbəri qeyd edib ki, müvafiq qərarlar qəbul olunarsa, səhmdarlar 2026-cı ilin maliyyə nəticələri üzrə də dividend əldə edə biləcəklər. Bununla bağlı gözləntilərin dekabr ayında açıqlanması nəzərdə tutulur.
Cavid Quliyev bu il Azərbaycanın ilk özəl şirkət IPO-sunu həyata keçirdiklərini və minlərlə investorun bankın inkişafına tərəfdaş olduğunu vurğulayıb.
“Bizim üçün IPO investorlarımızla uzunmüddətli tərəfdaşlığın başlanğıcıdır. Məqsədimiz dayanıqlı maliyyə nəticələri ilə səhmdarlarımız üçün dəyər yaratmaq və Azərbaycanın kapital bazarının inkişafına töhfəmizi davam etdirməkdir”, — deyə o bildirib.