Qızılın qiymati təxminən 2% artaraq, çərşənbə axşamı qeydə alınan və dörd günlük artım seriyasını dayandıran enişin bir hissəsini bərpa edib.
GDP xəbər verir ki,treyderlər eyni anda iki amili nəzərə almağa çalışırlar: qızıldakı geosiyasi risk mükafatı və dolların möhkəmlənməsi. Bu həftə Amerika valyutasının indeksi təxminən 1,5% artıb. İstiqrazların gəlirliliyi də yüksəlir, enerji daşıyıcılarının qiymətindəki kəskin sıçrayış isə inflyasiya risklərini gücləndirir.
Buna görə də investorlar pul-kredit siyasətinin tezliklə yumşaldılması ilə bağlı gözləntilərini azaltmağa başlayıblar. Eyni zamanda, çərşənbə axşamı fond bazarlarında baş verən satışlar bəzi iştirakçıları portfellərinin digər hissələrindəki marja tələblərini ödəmək üçün qızıl üzrə mövqelərini bağlamağa məcbur edib.
“Qızıl bazarında biz portfellərdə ümumi risk səviyyəsinin azalması ilə əlaqəli tipik bir hərəkət müşahidə edirik” – deyə Union Bancaire Privee (UBP SA) şirkətinin qlobal valyuta strategiyası rəhbəri Piter Kinsella bildirib. Onun sözlərinə görə, oxşar dinamika əvvəlki geosiyasi münaqişələr zamanı da müşahidə olunub.
Bununla yanaşı, qızıla olan “boğa” (artım) istiqamətli mərclərin həcmi kəskin şəkildə azalıb. ABŞ Əmtəə Fyuçersləri Ticarət Komissiyasının (CFTC) məlumatına görə, yanvarın sonundan etibarən kapital menecerlərinin xalis uzun mövqeyi təxminən onilliyin minimum səviyyəsinə yaxınlaşıb. Kinsellanın fikrincə, mövqelərin bu qədər aşağı səviyyədə olması qiymətlərin sonrakı eniş potensialını və miqyasını məhdudlaşdırmalıdır.
Qızılın yüksəliş potensialı qalır
İlin əvvəlindən qızıl təxminən beşdə bir bahalaşıb. Yanvarın sonunda qiymət unsiyası üçün 5 595 $-dan yuxarı olmaqla tarixi maksimuma çatıb. Artımı geosiyasi gərginlik, ticarət münaqişələri və ABŞ Federal Ehtiyat Sisteminin müstəqilliyi ilə bağlı narahatlıqlar dəstəkləyib.
Bu arada, bazarlar ABŞ, İsrail və İran arasındakı müharibənin inkişafını diqqətlə izləməyə davam edir. Çərşənbə axşamı İsrail Tehrana yeni zərbələr seriyası endirib. İsrailin Kan News agentliyinin məlumatına görə, Qum şəhərində iddia edildiyi kimi İranın ruhani liderlərinin ali rəhbər Ayətullah Əli Xameneinin mümkün varisi məsələsini müzakirə etdiyi obyekt vurulub. İranın yarımrəsmi Mehr agentliyi binaya hücumu təsdiqləyib, lakin həmin an onun istifadə edilmədiyini bildirib.
“Düşünürəm ki, biz qızıl qiymətlərinin bərpasını görəcəyik” – deyə Kinsella bildirib. Onun sözlərinə görə, uzunmüddətli artım faktorları qüvvədə qalır. “Münaqişə uzanarsa və ya qeyri-müəyyən şəkildə başa çatarsa, bu, yalnız davam edən geosiyasi riskləri vurğulayacaq.”
Qiymət artımını nə məhdudlaşdıra bilər
Lakin enerji daşıyıcılarının bahalaşması səbəbindən inflyasiya təzyiqi qiymətlərin sonrakı artımını məhdudlaşdıra bilər. Belə bir vəziyyətdə Federal Ehtiyat Sistemi və digər mərkəzi banklar faiz dərəcələrini daha uzun müddət yüksək səviyyədə saxlaya və ya hətta yenidən artıra bilərlər. Hal-hazırda treyderlər FED-in bu il faiz dərəcəsini 0.25 faiz bəndindən çox bir dəfədən çox endirmə ehtimalını təxminən 80% olaraq qiymətləndirirlər. Hələ cümə günü bazar iki endirimi tam olaraq gözləyirdi. Daha yüksək faiz dərəcələri ənənəvi olaraq qızılın artımını məhdudlaşdırır, çünki metal faiz gəliri gətirmir.
Enerji böhranının qarşısını almağa çalışan Prezident Donald Tramp, ABŞ-ın Hörmüz boğazından keçən tankerlərə və digər gəmilərə hərbi-dəniz müşayiəti və sığorta təminatı verəcəyini bildirib. Lakin gəmiçilik sənayesinin nümayəndələri bunun yalnız qismən həll olduğunu düşünürlər. Dünya neft və qaz tədarükünün təxminən beşdə birinin keçdiyi bu strateji marşrut vasitəsilə hərəkət hərbi əməliyyatlar səbəbindən praktiki olaraq dayanıb.
