Artan geosiyasi qeyri-müəyyənliklər və ABŞ administrasiyasına etimadın azalması fonunda bazar ertəsi günü qızılın unsiyasının qiyməti 5 min dollar səviyyəsini aşaraq tarixi ən yüksək səviyyəsini görüb.
GDP xəbər verir ki, Bakı vaxtı ilə saat 07:00-da spot qızıl qiyməti (anlıq qiymət) 2 faizə yaxın artımla 5093 dollara qədər yüksəlib. Fevral ayı üzrə ABŞ qızıl fyuçersləri də 1,79 faiz artaraq 5068,70 dollar səviyyəsinə qalxıb.
Qızıl qiymətləri 2025-ci ildə 64 faiz artıb. Bu yüksəliş təhlükəsiz liman tələbinin güclənməsi, ABŞ-da pul siyasətinin yumşaldılması, mərkəzi bankların güclü alışları və birja ticarət fondlarına (ETF) rekord səviyyədə vəsait axını ilə dəstəklənib. Çinin dekabr ayında ardıcıl 14-cü ay qızıl alışını davam etdirməsi də rallini “qidalandıran” amillər arasında yer alıb. Qızıl bu il ümumilikdə isə 17 faizdən çox bahalaşıb.
Qızılda son bahalaşmanın əsas səbəbi Tramp administrasiyasının proqnozlaşdırılması çətin qərarları ilə əlaqədar olaraq “ABŞ administrasiyasına və ABŞ aktivlərinə etimad böhranı”dır.
ABŞ Prezidenti Donald Tramp Avropadakı bir sıra müttəfiqlərinə qarşı gömrük rüsumu təhdidlərindən geri addım atsa da, Kanada və Fransaya qarşı yüksək vergi hədələri bazarlardakı qeyri-müəyyənliyi artırıb. Analitiklər qeyd edirlər ki, bu proseslər investorları alternativ təhlükəsiz liman axtarışına yönəldir.
Digər tərəfdən, Yaponiya yeninin bahalaşması ilə dollar qlobal miqyasda dəyər itirərkən, investorlar bu həftə keçiriləcək FED iclası ərəfəsində dollar mövqelərini azaltmağa başlayıblar. Zəifləyən dollar qızılı digər valyutalardan istifadə edən investorlar üçün daha cəlbedici edir.
Mütəxəssislər qızılın qiymətində yüksəlişin davam edə biləcəyini bildirirlər. Proqnozlar yaxın gələcəkdə qızılın qiymətinin təxminən 5500 dollar səviyyəsində çatacağını göstərir. Mümkün mənfəət satışları isə qısamüddətli olacaq.
Qiymətli metallarda yüksəliş yalnız qızıl ilə məhdudlaşmayıb. Gümüş 4,57 faiz bahalaşaraq qiyməti 108,60 dollarla rekord müəyyən edib. Platinin qiyməti 3,26 faiz artaraq 2857,41 dollara, palladiumum qiyməti isə 3,2 faiz qalxaraq 2074,40 dollara çatıb. Gümüşün qiyməti ötən cümə günü ilk dəfə 100 dollar səviyyəsini keçib.