Türk İnvestisiya Fondu (TIF) ilə Azərbaycan–Özbəkistan İnvestisiya Şirkəti (AUIC) arasında investisiya əməkdaşlığının perspektivlərinə dair görüş keçirilib.
GDP xəbər verir ki, Fondun məlumatına əsasən, oktyabrın 21-də keçirilən görüşdə birgə maliyyələşdirmə, investisiya təcrübəsinin mübadiləsi və hər iki qurumun prioritetlərinə uyğun layihələrin müəyyənləşdirilməsi məsələləri müzakirə olunub.
Görüşdə TIF-in baş direktoru Ramil Babayev, investisiyalar üzrə baş direktoru Səncər Usmanov və maliyyə üzrə baş direktor vəzifəsini icra edən M. Esat Mert iştirak ediblər. AUIC-i baş icraçı direktor Nazim Hacıyev, maliyyə direktoru Azər Mirtağıyev və baş icraçı direktorun müavini Sardor Xabibullayev təmsil ediblər.
Ramil Babayev üzv dövlətlər arasında iqtisadi inteqrasiyanın gücləndirilməsinin və regionda biznes imkanlarının genişləndirilməsinin Fondun əsas məqsədlərindən olduğunu bildirib. O, iqtisadi əlaqələri möhkəmləndirən və özəl sektorun inkişafını təşviq edən layihələrin dəstəklənməsi baxımından AUIC ilə tərəfdaşlığın əhəmiyyətini vurğulayıb.
AUIC nümayəndələri şirkətin investisiya mandatı, son fəaliyyəti və planlaşdırılan layihələri barədə məlumat veriblər. Onlar Azərbaycan və Özbəkistan arasında investisiya əməkdaşlığının genişləndirilməsi, biznes tərəfdaşlıqlarının qurulması və qarşılıqlı maraq doğuran sahələrdə layihələrin dəstəklənməsi üçün TIF ilə əməkdaşlığa maraq ifadə ediblər.
Tərəflər iqtisadiyyatın şaxələndirilməsinə və regionda investisiya əlaqələrinin gücləndirilməsinə töhfə verəcək praktiki əməkdaşlıq üzrə dialoqu davam etdirmək barədə razılığa gəliblər.