Biznesdə sürətlə inkişaf etmək qədər riskləri düzgün idarə etmək də vacibdir. Bankçılıq və fintex sektorunda risk və komplayns komandaları daha inamlı qərarların qəbuluna şərait yaratmalıdır.
GDP xəbər verir ki, bunu “Bir Ecosystem”in baş icraçı direktoru Fərid Hüseynov bildirib.
O, risklərin idarə edilməsini “Formula 1” yarışları ilə müqayisə edib. Qeyd edib ki, yarışın nəticəsini yalnız mühərrikin gücü deyil, pilotun kəskin döngələrdə sürəti düzgün idarə etməsi və vaxtında əyləcə basması müəyyənləşdirir. Hüseynovun fikrincə, bankçılıq və fintex sektorunda da eyni prinsip işləyir.
“Onların rolu inkişafı ləngitmək deyil, əksinə, cəsarətli qərarları daha inamla verməyimizə şərait yaratmaqdır”, – deyə o, risk və komplayns komandalarının fəaliyyətini şərh edib.
Fərid Hüseynov vurğulayıb ki, komplayns prosesə işin sonunda deyil, ilk gündən cəlb olunmalıdır. Məqsəd riskləri tamamilə aradan qaldıraraq fəaliyyəti məhdudlaşdırmaq yox, onları düzgün idarə etməklə biznesi irəli aparmaqdır.
O, bu mövzuların Azərbaycanda Komplayns Assosiasiyasının ilk rəsmi tədbirində müzakirə edildiyini də bildirib.
