Dünya bazarlarında neftin qiymətinin yüksəlməsi və ABŞ dollarının möhkəmlənməsi kriptovalyuta və səhm bazarlarında artımın bərpasını çətinləşdirir.
Brent markalı neftin qiyməti 2,1% artaraq 106,8 dollara çatıb. ABŞ dollarının indeksi 102,5 bənd ətrafında qərarlaşıb. Bitcoin isə 1,7% ucuzlaşaraq 82 428 dollar səviyyəsində ticarət olunur.
Bazarlardakı gərginliyin əsas səbəblərindən biri Yaxın Şərqdə geosiyasi risklərin artmasıdır. İranın neft tankerlərinə zərbələri və husilərin Səudiyyə Ərəbistanına hücumları enerji bazarında qeyri-müəyyənliyi gücləndirir.
Neftin yüksək qiymətləri qlobal inflyasiya risklərini artırmaqla yanaşı, iqtisadi artımı da məhdudlaşdırır. Brent neftinin 100 dollardan yuxarı qalması ABŞ Federal Ehtiyat Sisteminin (FED) faiz dərəcələrini sürətlə azaltmaq imkanlarını zəiflədir. Bu vəziyyət kriptovalyutalar və texnologiya şirkətlərinin səhmləri də daxil olmaqla riskli aktivlərə mənfi təsir göstərir.
Bu arada, korporativ sektorda da bir sıra mühüm hadisələr qeydə alınıb. ABŞ Maliyyə Nazirliyi “Binance” platformasının İrana qarşı sanksiyalardan yayınma ilə bağlı mümkün əməliyyatlarını araşdırır. “Strategy” əlavə 250 Bitcoin alıb, 192,4 milyon dolları isə STRC səhmlərinin geri alınmasına yönəldib. “BitMine” 12 532 Ethereum əldə edib, “Kraken” isə Dubayda fəaliyyət lisenziyası alıb.
Texnologiya sektorunda “Microsoft”un səhmləri yeni “Azure Maia 300” çipinin elanından sonra 1,3% bahalaşıb. Eyni zamanda, üçüncü rübdə qlobal smartfon tədarükünün yaddaş komponentlərinin bahalaşması səbəbindən 20% azalaraq 2012-ci ildən bəri ən aşağı səviyyəyə düşdüyü bildirilir.
Bazar iştirakçılarının qiymətləndirmələrinə görə, geosiyasi gərginlik səngimədikcə və neftin qiyməti 100 dollardan aşağı düşmədikcə riskli aktivlərdə dayanıqlı yüksəlişin bərpası çətin olacaq.