ABŞ Maliyyə Nazirliyi uzunmüddətli dövlət istiqrazlarının geri alınması proqramını genişləndirmək üçün təxminən 1 trilyon dollara yaxın vəsaitdən istifadə imkanını nəzərdən keçirir.
GDP xəbər verir ki, CNBC-nin məlumatına görə, söhbət ABŞ Xəzinədarlığının Ümumi Hesabında (TGA) olan və hazırda təxminən 950 milyard dollar təşkil edən vəsaitdən gedir. Bu resursların uzunmüddətli dövlət istiqrazlarının geri alınması əməliyyatlarının maliyyələşdirilməsinə yönəldilə biləcəyi bildirilir.
Belə bir addım ABŞ Maliyyə Nazirliyinə Federal Ehtiyat Sisteminin (FED) birbaşa iştirakı olmadan uzunmüddətli istiqrazların gəlirliliyinə təsir göstərmək imkanı verə bilər.
Məlumata görə, ötən həftə nazirlik istiqrazların minimum geri alış həcmini 2 milyard dollardan 4 milyard dollara yüksəldib. ABŞ-ın maliyyə naziri Skott Bessent gələcəkdə daha böyük həcmli geri alış əməliyyatlarının mümkünlüyünü də gündəmə gətirib.
Bu təşəbbüs uzunmüddətli istiqrazların gəlirliliyinin aşağı salınmasına və gəlirlilik əyrisinin uzun hissəsində təzyiqin azaldılmasına xidmət edə bilər. Eyni zamanda, belə addımlar maliyyə bazarlarında riskli aktivlər üçün əlavə dəstək amili kimi çıxış edə bilər.
Bununla belə, istiqrazların geri alınmasına yönəldiləcək vəsaitin yekun həcmi və əməliyyatların müddəti hələ müəyyənləşdirilməyib. Hazırda məsələ təsdiqlənmiş proqramdan daha çox nəzərdən keçirilən imkan kimi qiymətləndirilir.