“PAŞA Holding” MMC-yə məxsus bank səhmlərinin 56.8195%-lik hissəsi “PAŞA Maliyyə Holdinqi” MMC-yə ötürülüb.
GDP xəbər verir ki, hazırda “PAŞA Bank”ın səhmlərinin təxminən 53.97%-i “PAŞA Maliyyə Holdinqi” MMC-yə, 26.77%-i “Bless” MMC-yə, 9.5%-i Arif Paşayevə, 4.76%-i isə Mir Camal Paşayevə məxsusdur. Bakı Fond Birjasında sərbəst dövriyyədə olan səhmlər üzrə digər fiziki və hüquqi şəxslərin ümumi payı 5% təşkil edir.
Səhmlərin ötürülməsi ilə bağlı əməliyyat 12 may 2026-cı ildə həyata keçirilib.
“PAŞA Maliyyə Holdinqi” MMC 2025-ci ilin dekabrında “PAŞA Holding”in törəmə şirkəti kimi təsis edilib. Yeni holdinq PAŞA Qrupunun maliyyə xidmətləri, maliyyə texnologiyaları, elektron ticarət və texnologiya istiqamətlərində fəaliyyət göstərən bizneslərini vahid korporativ mərkəz altında birləşdirir.
Şirkətin əsas funksiyalarına portfel üzrə strateji idarəetmə, kapitalın bölüşdürülməsi, bizneslərin fəaliyyət nəticələrinin izlənilməsi və uzunmüddətli dəyərin yaradılması daxildir. Portfelə daxil olan şirkətlər isə əməliyyat müstəqilliyini qoruyub saxlayır.
Qeyd edək ki, “PAŞA Bank” 2026-cı ilin ilk yarısını 96.5 milyon manat xalis mənfəətlə başa vurub. Hesabat dövründə bankın faiz gəlirləri və kredit portfeli illik müqayisədə artıb.
İyunun sonuna bankın aktivləri təxminən 10 milyard manata, kredit portfeli 4 milyard manatdan yuxarı, kapitalı isə 1 milyard manata yaxın səviyyəyə çatıb.
“PAŞA Bank”ın 2026-cı ildə həyata keçirdiyi IPO-dan sonra yeni investorların bankın səhmdar kapitalındakı ümumi payı 5%-ə çatıb. Emissiya prospektində “PAŞA Holding”in bankdakı payının gələcəkdə “PAŞA Maliyyə Holdinqi”nə ötürülməsinin nəzərdə tutulduğu əvvəlcədən açıqlanmışdı.