2026-cı ildə Azərbaycan Mikromaliyyə Assosiasiyasının (AMFA) 12-ci Konfransı “Mikromaliyyə sektorunda İnvestisiya və Davamlı İnkişaf” mövzusunda keçiriləcək.
Konfrans Azərbaycanda mikromaliyyə sektoru üçün əlamətdar bir dövrə təsadüf edir. Belə ki, 2026-cı ildə ölkədə mikromaliyyə sektorunun yaranmasının 30, Azərbaycan Mikromaliyyə Assosiasiyasının fəaliyyətinin isə 25 ili tamam olur.
Üç onillik ərzində mikromaliyyə sektoru Azərbaycanda maliyyə xidmətlərinə çıxış imkanlarının genişləndirilməsində, fərdi sahibkarların və ailə təsərrüfatlarının maliyyələşdirilməsində, eləcə də regionlarda iqtisadi fəallığın dəstəklənməsində mühüm rol oynayıb.
AMFA-nın 12-ci Konfransı dövlət qurumlarının nümayəndələrini, maliyyə institutlarını, beynəlxalq inkişaf tərəfdaşlarını, investorları, xidmət təminatçılarını, mikromaliyyə təşkilatlarını və sahə üzrə ekspertləri bir araya gətirəcək.
“Mikromaliyyə sektorunda İnvestisiya və Davamlı İnkişaf” mövzusu altında təşkil ediləcək tədbir sektorun mövcud vəziyyətinin qiymətləndirilməsi, yeni inkişaf imkanlarının müzakirəsi və davamlı, inklüziv artım üçün prioritet istiqamətlərin müəyyənləşdirilməsi baxımından strateji platforma rolunu oynayacaq.
Konfrans çərçivəsində maliyyə inklüzivliyi strategiyaları və mikromaliyyə sektorunda tənzimləyici çərçivələr, maliyyəyə çıxış imkanlarının genişləndirilməsi və investorların rolu, rəqəmsal mikromaliyyədə kibertəhlükəsizlik çağırışları, risklərin idarə edilməsi, eləcə də rəqəmsal transformasiya və süni intellekt həllərinin tətbiqi kimi aktual məsələlərin müzakirəsi nəzərdə tutulur.
Müzakirələr zamanı maliyyə inklüzivliyinin daha da gücləndirilməsi, yeni texnologiyaların maliyyə xidmətlərinə inteqrasiyası, risklərin effektiv idarə olunması və innovativ həllərin mikromaliyyə sektorunun dayanıqlı inkişafına verə biləcəyi töhfələr diqqət mərkəzində olacaq.
Sektorun aparıcı iştirakçılarının və mütəxəssislərinin bir araya gələcəyi AMFA-nın 12-ci Konfransının yerli mikromaliyyə sahəsində ilin mühüm tədbirlərindən biri olacağı gözlənilir.
Konfransda iştirak etmək istəyən şəxslər qeydiyyatdan keçərək tədbirə qoşula bilərlər.