AZCON Holding şirkətlərindən olan “AzInTelecom” MMC Azərbaycana gətirilən mobil cihazların saxta IMEI kodlarla qeydiyyatdan keçirilməsinə qarşı mübarizə tədbirləri nəticəsində indiyədək kopyalanmış 77 614 IMEI koda “klon” statusu verilərək bloklanıb.
GDP xəbər verir ki, aparılan araşdırmalar zamanı kopyalanmış IMEI kodlarla Azərbaycanın mobil rabitə şəbəkəsinə indiyədək 1 613 177 dəfə qoşulma cəhdinin olduğu müəyyən edilib. Bütün cəhdlər “AzInTelecom”a məxsus Mobil Cihazların Qeydiyyat Sistemi (MCQS) tərəfindən aşkarlanaraq qarşısı alınıb.
Nazirlər Kabinetinin qərarı ilə təsdiq edilmiş “Mobil cihazların qeydiyyatının aparılması Qaydası”na əsasən, xaricdən Azərbaycana gətirilən mobil cihazların ölkənin telekommunikasiya şəbəkəsində istifadəsi üçün onların IMEI kodları 30 gün ərzində qeydiyyatdan keçirilməlidir.
Mobil cihazların qeydiyyatı onlayn şəkildə mygov portalı üzərindən və ya fiziki formada poçt məntəqələrində həyata keçirilə bilər.
“AzInTelecom” bildirir ki, mobil cihazların saxta IMEI kodlarla qeydiyyatdan keçirilməsinin qarşısının alınması həm abonentlərin hüquqlarının qorunmasına, həm də mobil rabitə bazarında şəffaflığın təmin edilməsinə xidmət edir.
Şirkət vətəndaşlara mobil telefon almamışdan əvvəl cihazın qutusu üzərində göstərilən IMEI nömrəsini mygov portalında yoxlamağı və etibarlı satış məntəqələrinə üstünlük verməyi tövsiyə edir.