Freedom Holding Türkiyəyə 300 milyon dollardan çox sərmayə yatırmağı planlaşdırır
GDP xəbər verir ki, Qazaxıstanlı milyarder Timur Turlovun rəhbərlik etdiyi Freedom Holding Corp. Türkiyə bazarında fəaliyyətini genişləndirməyə davam edir.
Holdinq bu yaxınlarda Türkiyədə bankın alınması üzrə sövdələşməni başa çatdırıb. Bunun ardınca şirkətin törəmə strukturu Türkiyənin müvafiq tənzimləyici qurumundan broker fəaliyyəti üçün lisenziya əldə edib. Bildirilir ki, bununla şirkət son 30 ildən artıq müddətdə Türkiyədə belə lisenziya alan ilk xarici broker olub.
Freedom Yatırım broker şirkəti və Freedom Bank A.Ş.-nin fəaliyyətə başlaması ilə Freedom Holding Corp. Türkiyədə qısa müddət ərzində vahid maliyyə ekosistemi formalaşdırmağı planlaşdırır.
Daha əvvəl Timur Turlov Türkiyə bazarının yüksək inkişaf potensialına malik olduğunu bildirərək, ölkədə biznesin genişləndirilməsinə 300 milyon ABŞ dollarından çox sərmayə yatırmağı planlaşdırdığını açıqlayıb.
Beləliklə, holdinq Türkiyə bazarında həm bank, həm də broker xidmətləri istiqamətində mövqelərini gücləndirməyi hədəfləyir.