Yaşayış binalarının tikintisi və satışı ilə məşğul olan, “Kristal Abşeron” MTK ilə birgə çalışan “Kristal Bakı” ASC-nin yığılmış zərəri 30 milyon manatdan çoxdur. Diqqəti cəlb edən, 445 milyon manat cəmi aktivləri malik olan “Kristal Bakı” şirkətinin ötən il mənzillərin tikintisi və satışı fəaliyyətindən cəmi 52 min manat gəlir əldə etməsidir.
“Kristal Bakı” ASC 2021-ci ili 2 milyon 384 min manat, 2022-ci ili 11 milyon 972 min manat, 2023-cü ili 15 milyon 453 min manat xalis zərər ilə başa vurub. 31 dekabr 2023-cü il tarixində Şirkətin yığılmış zərəri 30 milyon 131 min manat təşkil edib. Şirkətin cəmi kapitalı mənfi 30 milyon 121 min manat olub.
2023-cü ildə “Kristal Bakı” ASC əsas əməliyyat gəliri 52 min manat, məzənnə fərqindən gəliri 63 min manat, faiz gəliri 7 milyon 715 min manat olmaqla cəmi 7 milyon 830 min manat təşkil edib. Ötən il şirkətin cəmi xərcləri isə 27 milyon 519 min manat təşkil edib. Beləliklə, mənfəət vergisindən əvvəlki zərər 19 milyon 690 min manat olub. Mənfəət vergisi üzrə 4 milyon 236 min manatlıq dəyişiklik zərəri azaldıb.
2022-ci ildə “Kristal Bakı” ASC-nin əsas əməliyyat gəliri (tikinti işlərindən) 132 min manat təşkil etmişdi. Şirkətdən bildirilib ki, 2024-cü ilin ilk 6 ayında əsas əməliyyat gəliri 318 min manat olub.
31 dekabr 2023-cü il tarixində “Kristal Bakı” ASC 445 milyon 200 min manat cəmi aktivlərə malik olub. Şirkət 2022-ci ilin sonunda 193 milyon 954 min manat cəmi aktivlərə malik idi (ötən il şirkətin cəmi aktivləri 2,3 dəfə artıb).
2023-cü ildə “Kristal Bakı” ASC-nin cəmi öhdəlikləri 2,3 dəfə artaraq 475 milyon 321 min manata çatıb. Öhdəliklərin artması borcların və alınan avansın artması ilə əlaqədardır.
ŞİRKƏTİN NİZAMNAMƏ KAPİTALI ARTIRILIR
Cəmi kapitalı mənfidə olan “Kristal Bakı” ASC hər birinin nominal dəyəri 1 manat olan 990 min ədəd adi, adlı və sənədsiz səhm buraxıb. Əgər səhmlərin yerləşdirilməsi uğurla yekunlaşarsa “Kristal Bakı” ASC-nin nizamnamə kapital 990 min manat artaraq 10 min manatdan 1 milyon manata yüksələcəkdir.
Qeyd edək ki, hazırda “Kristal Bakı” ASC-nin səhmdarları Vəliyev Pərviz Ağalar oğlu (50%), Nəbiyev Fərid Elbrus oğlu (25%) və Nəbiyev Araz Mahayət oğludur (25%). Pərviz Vəliyev “Azəraqrartikinti” ASC-də Sədr müavini, Fərid Nəbiyev “Kristal Bakı” ASC-də Maliyyə direktoru, Araz Nəbiyev isə “A+CO” ASC-də Direktor müavini olaraq çalışırlar. Fərid Nəbiyev Araz Nəbiyevin əmisi oğludur.
Pərviz Vəliyev “Azəraqrartikinti” ASC-nin Müşahidə Şurasının sədri Ağalar Vəliyevin oğludur. Araz Nəbiyev isə “Kristal Abşeron” MTK-nın Müşahidə Şurasının sədri Mahayət Nəbiyevin övladıdır.
Mənbə: Marja