OPEC analitikləri ardıcıl dördüncü aydır ki, 2026-cı il üzrə qlobal neft tələbatının artım proqnozunu aşağı salırlar. Təşkilatın aylıq hesabatına əsasən, hazırda dünya üzrə neft tələbatının gündəlik 580 min barel artaraq 105,74 milyon barelə çatacağı gözlənilir.
Əvvəlki proqnozda tələbatın gündəlik 780 min barel artaraq 105,94 milyon barelə çatacağı nəzərdə tutulurdu. Beləliklə, proqnoz gündəlik 200 min barel azaldılıb.
Proqnozun aşağı salınması əsasən İqtisadi Əməkdaşlıq və İnkişaf Təşkilatına (OECD) üzv ölkələrdə neft tələbatı ilə bağlı gözləntilərin pisləşməsi ilə əlaqədardır. OECD-nin Avropa ölkələrində tələbatın azalması üzrə proqnoz gündəlik 90 min bareldən 120 min barelə, Asiya ölkələrində isə 120 min bareldən 170 min barelə yüksəldilib.
Bununla yanaşı, Çin və Hindistanda da neft tələbatının əvvəl gözləniləndən daha zəif artacağı proqnozlaşdırılır. Çində tələbatın gündəlik 90 min barel, Hindistanda isə 60 min barel artacağı gözlənilir. Əvvəlki proqnozlarda bu göstəricilər müvafiq olaraq 120 min və 90 min barel təşkil edirdi.
OECD-yə daxil olmayan digər Asiya ölkələrində də neft tələbatının artımı üzrə proqnoz aşağı salınıb. Gözlənilən artım gündəlik 220 min bareldən 170 min barelə endirilib.