Ülvi Qasımov ABB-də idarəedici direktor vəzifəsinə təyin olunub.
GDP xəbər verir ki, bu barədə Qasımov özünün “LinkedIn” hesabında paylaşım edib. O bildirib ki, oktyabrın 1-dən etibarən yeni vəzifəsinin icrasına başlayıb.
“Bankçılıq sahəsində təxminən 20 illik təcrübəm mənə öyrətdi ki, davamlı artım etimada, güclü komanda işinə və uzunmüddətli müştəri tərəfdaşlığına əsaslanır. Bu prinsipləri bu yeni fəsildə də davam etdirəcəyəm”, – deyə o qeyd edib.
Qasımov yeni vəzifəyə təyinatı ilə bağlı ABB-nin İdarə Heyətinə, həmkarlarına və bankın kollektivinə göstərdikləri etimada görə təşəkkür edib. O, həmçinin müştərilərə və tərəfdaşlara davamlı dəstəklərinə görə minnətdarlığını bildirib.
Məlumata görə, Ülvi Qasımov 2017-ci ilin fevralından ABB-də çalışır. O, bu müddət ərzində müxtəlif rəhbər vəzifələrdə fəaliyyət göstərib.
Qasımov 2018-ci ilin mayından 2024-cü ilin iyununa qədər ABB-də Korporativ Biznes Departamentinin direktoru, 2024-cü ilin iyunundan isə Korporativ və KOB Ofisinin rəhbəri vəzifəsində çalışıb.
Bundan əvvəl, 2017-ci ilin fevralından 2018-ci ilin mayınadək ABB İdarə Heyətinin sədrinin müşaviri olub.
Yeni vəzifəsindən əvvəl Qasımovun ABB-də ümumilikdə 9 ildən çox iş təcrübəsi formalaşıb.
O, daha əvvəl Unibankda da müxtəlif vəzifələrdə çalışıb. Burada kreditləşmə üzrə supervayzer, biznes mərkəzinin direktor müavini, biznes mərkəzinin meneceri və Korporativ Bankçılıqda Kreditləşmə şöbəsinin rəhbəri vəzifələrini tutub.
Bundan əlavə, Qasımov 2020-ci ildən International Leasing Company LLC, 2026-cı ilin iyunundan isə ABB Invest şirkətinin Müşahidə Şurasının üzvüdür.