2025-ci ilin yanvar–dekabr aylarında Azərbaycanda fəaliyyət göstərən investisiya şirkətlərinin cəmi əməliyyatların həcminə əsaslanan reytinqi bazarda formalaşmış real bazar payı bölgüsünü aydın şəkildə əks etdirir.
GDP Bakı Fond Birjasından verilən məlumata istinadla xəbər verir ki, 2025-ci ilun yanvar-dekabr ayları ərzində investisiya şirkətlərinin ümumi əməliyyat həcmi 105,69 milyard manat təşkil etmişdir.
Reytinqə 44,72 milyard manatlıq əməliyyat həcmi və 42,31% bazar payı ilə PAŞA Kapital İnvestisiya Şirkəti QSC liderlik edir. Onu 38,39 milyard manat əməliyyat həcmi və 36,33% bazar payı ilə ABB İnvest İnvestisiya Şirkəti QSC izləyir ki, bu da bazarın böyük hissəsinin ilk iki iştirakçı arasında cəmləşdiyini göstərir.
Üçüncü yerdə 6,67 milyard manatlıq əməliyyat həcmi və 6,31 faiz bazar payı ilə CPM-İnvest İnvestisiya Şirkəti QSC qərarlaşmışdır. Orta seqmentdə isə göstəricilər bir-birinə yaxın olmaqla, Assist Finance İnvestisiya Şirkəti ASC 4,33 milyard manat və 4,10%, Unicapital İnvestisiya Şirkəti ASC isə 4,31 milyard manat və 4,08% bazar payı ilə seçilir. Növbəti pillələrdə İnvest-Az İnvestisiya Şirkəti QSC 2,50 milyard manatlıq əməliyyat həcmi ilə 2,37% , Xalq Kapital İnvestisiya Şirkəti QSC isə 2,09 milyard manatlıq dövriyyə ilə 1,97% bazar payına malik olmuşdur.
Reytinqin davamında Capital Partners İnvestisiya Şirkəti QSC 1,32 milyard manat və 1,25 % payla yer alır.
Daha aşağı həcmlərlə fəaliyyət göstərən iştirakçılar sırasında Troni İnvestisiya Şirkəti QSC 618,1 milyon manat (0,58 faiz), İnno Kapital İnvestisiya Şirkəti ASC 329,7 milyon manat (0,31 faiz), CFI FINANCIAL İnvestisiya Şirkəti QSC213,2 milyon manat (0,20 faiz) və MFX Trading İnvestisiya Şirkəti 197,9 milyon manat (0,19 faiz) əməliyyat həcmi ilə təmsil olunmuşdur. Siyahının sonunda isə 5,6 milyon manatlıq əməliyyat həcmi və 0,01 faiz bazar payı ilə ASC “Xalq” Bankı qərarlaşmışdır.
Ümumilikdə, təqdim olunan reytinq BFB-də əməliyyatların yüksək dərəcədə konsentrasiyalaşdığını, bazar dövriyyəsinin əsas hissəsinin bir neçə aparıcı investisiya şirkətinin payına düşdüyünü və digər iştirakçıların daha məhdud payla fəaliyyət göstərdiyini açıq şəkildə ortaya qoyur.
Müəllif: Aynur Qəniyeva