Azərbaycanın energetika nazirinin müavini Elnur Soltanov bildirib ki, Azərbaycanın hasilatın pay bölgüsü sazişlərini bir dəfə də olsun dəyişməməsi tərəfdaşlara müsbət siqnal verir.
GDP xəbər verir ki, nazir müavini bu fikri ADIPEC 2026 Strateji Konfransı çərçivəsində keçirilən “Sərhədlərdən kənar. Milli enerji strategiyaları qarşılıqlı əlaqəli qlobal sistem yarada bilərmi?” mövzusunda panel müzakirəsində səsləndirib.
“Dayanıqlılıq vacibdir. Biz Qafqazda münasibətləri necə yaxşı idarə etməyi bilirik”, – deyə Soltanov bildirib.
Nazir müavini enerji əməkdaşlığında etimadın rolunu da vurğulayıb.
“İlk suala qayıtsaq, məsələ yenə də etimada, etimada, etimada gəlib çıxır. Biz hasilatın pay bölgüsü sazişlərini bir dəfə də olsun dəyişməmiş ölkəyik. Bu da tərəfdaşlarımıza çox müsbət siqnal verir”, – o qeyd edib.
Soltanov Azərbaycanın 1990-cı illərdə strateji enerji tərəfdaşı kimi BP-ni dəvət etməsindən də danışıb. Onun sözlərinə görə, həmin dövrdə BP-nin gəlişinə şirkətin baş ofisinin yerləşdiyi ölkənin də bu tərəfdaşlığa qoşulması kimi baxılırdı. Nazir müavini bu nümunə ilə siyasət və iqtisadiyyatın qarşılıqlı təsirinin Azərbaycan üçün xüsusi əhəmiyyət daşıdığını vurğulayıb.
ADIPEC Strateji Konfransında enerji sektorunun bütün dəyər zənciri üzrə əməkdaşlıq, artan enerji tələbatının qarşılanması, rəqabət qabiliyyətinin gücləndirilməsi və iqtisadi artımın dəstəklənməsi müzakirə olunur.