Azərbaycan Mərkəzi Bankı investisiya xidmətləri qaydalarına dəyişikliklər edib
GDP xəbər verir ki, Azərbaycan Mərkəzi Bankının İdarə Heyəti investisiya şirkətləri və bankların fəaliyyətini tənzimləyən qaydalara mühüm dəyişikliklər edib. 10 dekabr 2024-cü il tarixli 49/4 nömrəli qərarla təsdiqlənən dəyişikliklər 2021-ci ildə qəbul edilmiş “İnvestisiya şirkətləri və banklar tərəfindən investisiya xidmətlərinin həyata keçirilməsi Qaydası”na əlavələri əhatə edir.
Yeni qaydalar Mərkəzi Bankın buraxdığı qiymətli kağızlar və törəmə maliyyə alətləri ilə bağlı əməliyyatları tənzimləyir. Dəyişikliklərə əsasən, investisiya şirkəti və bank əməkdaşlarının fəaliyyətinə dair məhdudiyyətlər müəyyən edilib. Belə ki, müştəri sifarişlərini qəbul və icra edən əməkdaşlar eyni zamanda digər müəyyən investisiya xidmətlərini göstərə bilməzlər.
Bundan əlavə, bankların investisiya xidmətlərini həyata keçirən bütün işçilərinin müvafiq ixtisas şəhadətnaməsinə malik olması tələbi də qərarda öz əksini tapıb.
Qərar Mərkəzi Bankın sədri Taleh Kazımov tərəfindən imzalanıb.