S&P500 indeksi 1,9% azaldı, Nasdaq Composite isə həftə ərzində 2,34% gerilədi ki, bu da noyabrdan bəri ən böyük enişdir.
Russell 2000 indeksi korreksiya zonasına daxil oldu. Fed-in dekabr iclası göstərdi ki, rəsmilər inflyasiyanın 2%-lik hədəfə doğru azalacağını gözləyirlər, lakin bu prosesin daha uzun çəkə biləcəyini vurğuladılar.
Dekabr ayı üzrə məşğulluq hesabatı 256 min yeni iş yeri açıldığını göstərdi, bu isə proqnozlaşdırılan 155 mindən yuxarıdır. İllik əməkhaqqı artımı 3,9% təşkil edərək, əmək bazarının dayanıqlılığını nümayiş etdirdi.
10 illik ABŞ xəzinə istiqrazlarının gəlirliliyi 4,73%-ə yüksələrək 2023-cü ilin oktyabr səviyyələrinə yaxınlaşdı.
Avropa
Almaniyada dekabr inflyasiyası 2,9%-ə çatıb ki, bu da gözləntilərdən yuxarıdır və noyabrda qeydə alınan 2,4%-dən çoxdur. Bahalaşmaya əsas səbəb enerji və ərzaq qiymətlərinin artmasıdır. Oxşar tendensiya İspaniyada da müşahidə edildi, burada inflyasiya 2,8%-ə çatdı.
Bu göstəricilər, Avropa Mərkəzi Bankının (AMB) daha əvvəl bəzi rəsmilər tərəfindən irəli sürülən kəskin faiz endirimləri ehtimallarını zəiflətdi.
Almaniyanın sənaye istehsalı noyabrda 1,5% artaraq 0,5%-lik proqnozu üstələdi. Bununla belə, ölkə, qismən rüsumlarla bağlı risklərə görə, ardıcıl ikinci illik ÜDM azalmasına doğru irəliləyir.
Yaponiya
Yaponiyanın Nikkei 225 indeksi 1,8%, TOPIX isə 2,5% azaldı. Yaponiya Mərkəzi Bankının (BoJ) növbəti faiz artımı ilə bağlı ehtimallar müzakirə olunmağa davam etdi. ABŞ-Yaponiya faiz dərəcələri fərqi fonunda yen dollar qarşısında 158,1 səviyyəsinə qədər ucuzlaşdı. 10 illik Yaponiya dövlət istiqrazlarının gəlirliliyi 1,19%-ə yüksələrək 2011-ci ildən bəri ən yüksək həddə çatdı.
Çin
Çin birjaları, böyük fond menecerlərindən bazarlardakı gərginliyi azaltmaq üçün aksiyaları məhdud satmağı xahiş etdi. ABŞ rüsumlarına dair qorxular səbəbindən aksiyalar ucuzlaşdı. Şanxay Kompozit indeksi 1,34%, Hang Seng 3,52% gerilədi.
Dekabr inflyasiya göstəriciləri 0,1% artım nümayiş etdirdi ki, bu da davam edən deflyasiya narahatlıqlarına işarədir. İstehsalçı qiymət indeksi (PPI) 2,3% azaldı və artıq 27-ci ay ardıcıl olaraq fabrik qiymətlərində deflyasiya qeydə alınır. Çin Xalq Bankı tələbi artırmaq üçün yumşaq monetar siyasətlər tətbiq edəcəyinə söz verdi.
Neft
ABŞ Rusiya neft sənayesinə qarşı genişmiqyaslı sanksiyalar elan etməsi səbəbindən neft qiymətləri kəskin artdı. Brent markalı neft 2,84 dollar (3,69%) bahalaşaraq barreli 79,76 dollara, ABŞ xam nefti isə 2,65 dollar (3,58%) yüksələrək barreli 76,57 dollara çatdı. Hər iki göstərici oktyabrdan bəri ən yüksək səviyyədə bağlandı. Sanksiyalar “Gazprom Neft” və “Surgutneftegas” şirkətlərini, onların törəmə müəssisələrini, 180-dən çox tankeri, eləcə də bir neçə Rusiya enerji rəsmisini və rəhbərini hədəf alır.
Avropada əsas təbii qaz qiymət göstəricisi sayılan Dutch TTF-in qiyməti, Ukrayna üzərindən Avropaya Rusiya qazının nəqlinin dayandırılması səbəbindən, 4%-dən çox artaraq meqavatt-saatı 51 avroya yüksəldi və 2023-cü ilin oktyabrından bəri ən yüksək səviyyəyə çatdı.
Regionun şimalında hökm sürən sərt soyuqlar qiymətləri daha da artırdı. Son həftələrdəki xüsusilə soyuq hava nəticəsində Avropanın qaz ehtiyatları təxminən 75%-ə düşərək 2021-ci ildən bəri ən sürətli azalma tempini göstərdi.
Sentyabrın sonunda – yəni ehtiyatların bərpası mövsümü başa çatdıqdan sonra – dekabrın ortalarınadək bloka daxil olan anbarlardakı qaz həcmi təxminən 19% azalıb.
Həftəlik İcmal Investor Club tərəfindən hazırlanıb