Bakı Fond Birjasının (BFB) nümayəndə heyəti Qazaxıstanın Almata şəhərinə işgüzar səfər edib.
GDP xəbər verir ki, səfər çərçivəsində BFB və Qazaxıstan Fond Birjası (KASE) rəhbər heyəti arasında görüş keçirilib. Görüşdə hər iki birjanın 2024-cü ilin yekun nəticələri, ticarət platformalarının və məlumat mübadiləsi mexanizmlərinin inkişafı, yaşıl istiqrazlar sahəsində təcrübə mübadiləsi və yeni texnologiyaların tətbiqi imkanları müzakirə olunub.
Bundan əlavə, 14 fevral tarixində BFB nümayəndə heyəti KASE-nin Tabadul Hub platformasına qoşulması münasibətilə təşkil edilən Beynəlxalq Konfransda iştirak edib. Konfransda Qazaxıstan rəsmiləri, korporativ sektorun və beynəlxalq fond birjalarının nümayəndələri iştirak ediblər. Panel müzakirələrində inkişaf edən bazarların keçdiyi yollar, regional ticarət üzrə əməkdaşlıq və Qazaxıstan fond bazarının investorlar üçün cəlbedici platforma olması kimi mövzular müzakirə edilib.
Qeyd edək ki, Tabadul Hub platforması 2022-ci ildə Abu Dabi Qiymətli Kağızlar Birjası (ADX) tərəfindən istifadəyə verilib və regionun qarşılıqlı bazar modeli ilə fəaliyyət göstərən ilk rəqəmsal birjası hesab olunur.