Azərbaycan Mərkəzi Bankı (AMB) 2025-ci ilin fevral ayında daimi imkan və açıq bazar əməliyyatlarının aparılması şərtlərində dəyişikliklər edib. Belə ki, bir günlük daimi imkan depozit və əks-repo əməliyyatlarının müddəti 24 saatdan 1 gecəliyə keçirilib.
Eyni zamanda not hərraclarında minimum iştirakçı sayına qoyulan tələb ləğv edilib. Bu yeniliklər Mərkəzi Bankın pul siyasətinin əməliyyat çərçivəsinin təkmilləşdirilməsi tədbirləri çərçivəsində həyata keçirilib.
Qeyd edək ki, qısamüddətli pul bazarında orta faizlər Mərkəzi Bankın faiz dəhlizi çərçivəsində hərəkət edir. Ötən ilin sonunda hökumət hesabları qalıqlarının azalması bank sistemində likvidliyi artırıb, nəticədə 2024-cü ilin dekabrında 1D AZIR 7.68%-ə yüksəldikdən sonra cari ilin əvvəlində faizlər azalmağa başlayıb. Yanvar və fevral aylarında orta günlük 1D AZIR müvafiq olaraq dekabr ayı ilə müqayisədə 0.6 və 0.2 faiz bəndi aşağı düşüb.
Bu dəyişikliklər Mərkəzi Bankın faiz siyasətinin effektivliyini artırmağa və maliyyə bazarında tarazlığın qorunmasına xidmət edir.