“AzerGold” QSC-nin yerli qızıldan hazırlanan sikkə və külçələrinin pərakəndə satışında müvəqqəti fasilə yaranıb.
GDP xəbər verir ki, şirkətin rəsmi satış platforması olan azergold.gift saytının “Məhsullar” bölməsindən qızıl məhsullarına dair məlumatlar artıq əlçatan deyil və hazırda onlayn alış imkanı mövcud deyil.
Bakı şəhəri, Bülbül prospekti 3 ünvanında yerləşən “AzerGold” Satış və mübadilə mərkəzində də qızıl sikkə və külçələrin satışı dayandırılıb. Mərkəzdən verilən məlumata əsasən, bu, anbarda qızıl məhsullarının olmaması ilə əlaqədardır. Gümüş sikkələrin satışı isə normal qaydada davam etdirilir.
“AzerGold” tərəfindən qızıl məhsullarının aprelin 15-dən etibarən yenidən satışa çıxarılacağı gözlənilir.
Qeyd edək ki, dünya bazarında qızılın qiyməti geo-siyasi gərginlik və iqtisadi narahatlıqlar səbəbindən sürətlə artmaqdadır. Ötən gün 1 unsiya qızılın qiyməti 3100 dollar səviyyəsini keçərək yeni rekord müəyyən edib. Sarı metalın kəskin bahalaşması ona olan tələbatı daha da artırıb.