Azərbaycan Fond Bazarı İştirakçılarının Assosiasiyası (AFBİA) və Junior Achievement Azərbaycan (JAA) arasında gənclərin maliyyə savadlılığının artırılması məqsədilə əməkdaşlıq memorandumu imzalanıb.
Sənədin imzalanması mərasimində iştirak edən tərəflər, bu təşəbbüsün gənclərin kapital bazarları ilə bağlı biliklərini genişləndirəcəyini və onların iqtisadi qərarlar vermə bacarıqlarını inkişaf etdirəcəyini vurğulayıblar.
Əməkdaşlıq çərçivəsində tələbələr üçün təlimlər, seminarlar və tədbirlər keçiriləcək, onlara investisiya və maliyyə bazarlarının işləmə mexanizmləri haqqında fundamental biliklər öyrədiləcək. Layihənin əsas məqsədi gənclərdə maliyyə savadlılığını yüksəltmək və onların iqtisadi fəaliyyətlərə daha aktiv qoşulmasına şərait yaratmaqdır.
AFBİA və JAA nümayəndələri bu təşəbbüsün gələcək iqtisadi inkişafa önəmli töhfə verəcəyinə inanaraq, əməkdaşlığın uğurlu olacağına ümid bəsləyirlər.
