Son günlərdə dünya bazarlarında neft qiymətlərinin kəskin enməsi qlobal iqtisadiyyatda yeni narahatlıqlar yaradıb. Neftin qiyməti son bir həftə ərzində təxminən 16% enərək bir barel üçün 61 dollara düşüb.
GDP xəbər verir ki, Milli Məclisin İqtisadi siyasət, sənaye və sahibkarlıq komitəsinin sədri Tahir Mirkişili bildirib ki, beynəlxalq analitiklərin proqnozlarına görə, əgər ABŞ-də Tramp administrasiyası tarifləri azaldarsa və dünya iqtisadiyyatı resessiyadan yan keçərsə, neftin qiyməti 2025-ci ildə 62 dollar səviyyəsində sabitləşə bilər. Lakin əks halda, qiymətlər ilin sonuna qədər bir barel üçün 50 dollara qədər enə bilər.
Qeyd edək ki, 2025-ci il Azərbaycan Dövlət Büdcəsi qəbul edilərkən hesablamalar neftin qiymətinin 70 dollar səviyyəsində olacağı baza ssenarisi üzərində qurulmuşdu. Bununla yanaşı, Maliyyə Nazirliyi pessimist ssenari kimi neftin qiymətinin 60 dollara düşəcəyi halı da nəzərdən keçirib.
Mirkişilinin sözlərinə görə, qiymətin 60 dollara düşməsi halında Dövlət Büdcəsi gəlirlərinin 340 milyon manat, Dövlət Neft Fondu gəlirlərinin isə 2.1 milyard manat azalacağı proqnozlaşdırılır. Bu isə o deməkdir ki, neftin qiymətinin 10 dollar azalması dövlət büdcəsi gəlirlərinə cəmi 0.8% azaldıcı təsir göstərəcək, Dövlət Neft Fondu büdcəsinin gəlirlərinə isə 14.5% daha ciddi təsir edəcək.
Komitə sədrinin məlumatına görə, 2025-ci ilin birinci rübünün nəticələri göstərir ki, hazırda dövlət büdcəsində 1.6 milyard manatlıq profisit mövcuddur. “Verilən proqnozlar əsasında hazırda Dövlət büdcəsinin icrası ilə bağlı ciddi risklər görsənmir. Azərbaycanın ciddi iqtisadi ehtiyatları var,” – deyə Mirkişili vurğulayıb.
O əlavə edib ki, hadisələrin gedişatına uyğun olaraq tarazlayıcı və əlverişli iqtisadi siyasət icra ediləcəkdir.