Azərbaycan Mərkəzi Bankının (AMB) sədrinin birinci müavini Əliyar Məmmədyarov ABŞ səfəri çərçivəsində Dünya Bankı Qrupunun (DBQ) prezidenti Acay Banqa ilə keçirilən yüksək səviyyəli görüşdə iştirak edib.
Görüşdə Dünya Bankı Qrupuna daxil olan təşkilatların rəhbərləri və Azərbaycanın da üzv olduğu Seçki Qrupuna daxil ölkələrin mərkəzi bankları və maliyyə nazirliklərinin rəsmiləri iştirak ediblər.
Müzakirələr zamanı qlobal maliyyə gündəminin aktual mövzuları, regional əməkdaşlığın gücləndirilməsi və dayanıqlı maliyyələşmə mənbələrinin genişləndirilməsi məsələləri diqqət mərkəzində olub.
Dünya Bankının prezidenti Acay Banqa innovativ texnologiyaların və süni intellektin iqtisadiyyatın müxtəlif sahələrində tətbiqinin potensial faydaları və riskləri barədə fikirlərini tədbir iştirakçıları ilə bölüşüb.
Görüş çərçivəsində həmçinin Seçki Qrupuna üzv ölkələrdə mövcud iqtisadi imkanlar və çağırışlar ətrafında geniş fikir mübadiləsi aparılıb.
Əliyar Məmmədyarov görüşün təşkili və müzakirə olunan əhəmiyyətli məsələlərə görə Dünya Bankı Qrupunun prezidentinə təşəkkürünü bildirib.