ATM-lərdə müasir texnologiyaların tətbiqi istiqamətində növbəti yenilik reallaşdırılacaq. Belə ki, yaxın gələcəkdə bankomatlarda istifadəçilərin identifikasiyası üçün SİMA üztanıma sistemi tətbiq ediləcək.
GDP xəbər verir ki, bu barədə məlumat “Azintelecom-un rəqəmsal xidmətləri medianın gözü ilə” adlı tədbirdə “AzInTelecom” MMC-nin Məhsul və xidmətlər şöbəsinin müdiri Tamerlan Məşədihəsənli tərəfindən verilib.
Onun sözlərinə görə, bu texnologiyanın tətbiqi vətəndaşların bank xidmətlərinə daha sürətli və təhlükəsiz şəkildə çıxışını təmin edəcək.
“Hazırda bu istiqamətdə işlər davam etdirilir. Gələcəkdə vətəndaşlar ATM-lərdə əməliyyat apararkən əlavə kart və ya şifrə daxil etmədən, sadəcə üz tanıma ilə identifikasiya olunacaqlar,” – deyə Məşədihəsənli qeyd edib.
Qeyd edək ki, SİMA — rəqəmsal imza və identifikasiya platformasıdır və Azərbaycan vətəndaşlarına müxtəlif elektron xidmətlərə asan çıxış imkanı yaradır. SİMA-nın ATM-lərə inteqrasiyası rəqəmsal transformasiyanın daha bir mühüm mərhələsi hesab olunur.