Avropa Yenidənqurma və İnkişaf Bankı (AYİB, EBRD) Azərbaycan manatında 50 milyon manat həcmində üzən faizli istiqraz emissiyasına başlayır.
GDP xəbər verir ki, Emissiya Prospektinə əsasən, istiqrazlar 1 oktyabr 2025-ci ildə ticarətə buraxılacaq və 1 oktyabr 2026-cı ildə geri ödəniləcək. İstiqrazların illik faizi Azərbaycan Banklararası Faiz Dərəcəsi (AZIR) əsasında müəyyən olunacaq və ödənişlər rüblük qaydada həyata keçiriləcək.
500 ədəd, hər biri 100 min AZN nominal dəyərində olan istiqrazlar Bakı Fond Birjasında listinqə daxil ediləcək.
EBRD bildirib ki, “Bu emissiya Azərbaycanın kapital bazarında mühüm hadisə hesab olunur və yerli bazarda milli valyutada istiqrazların rolunu daha da gücləndirəcək”.
İstiqrazlar bankın birbaşa və təminatsız öhdəliyi olacaq və hər hansı hökumətin və ya Bank üzvünün öhdəliyində deyil.
Buraxılışda cəlb olunacaq vəsaitlər Bankın adi kapital ehtiyatlarına daxil ediləcək və onlardan Bankın adi əməliyyatlarında istifadə olunacaq.
Anderrayterlər “ABB-İnvest İnvestisiya Şirkəti” QSC və “Unicapital İnvestisiya Şirkəti” ASC-lərdir.
Qeyd edək ki, Avropa Yenidənqurma və İnkişaf Bankı Azərbaycanda ilk dəfə istiqraz emissiya edir.