Azərbaycanda süni intellekt sahəsində yeni əməkdaşlıq platforması formalaşdırılır.
GDP xəbər verir ki, Rəqəmsal İnkişaf və Nəqliyyat Nazirliyi, Elm və Təhsil Nazirliyi və OpenAI arasında qurulan tərəfdaşlıq ölkədə innovasiya və rəqəmsal transformasiya prosesinə əlavə təkan verəcək.
Bu barədə Azərbaycan İnnovasiya və Rəqəmsal İnkişaf Agentliyinin (IDDA) İdarə Heyətinin sədri Fərid Osmanov paylaşım edib.
“Süni intellekt son illərdə ölkələrin rəqabət qabiliyyətini, iqtisadi inkişafını və insan kapitalının keyfiyyətini müəyyən edən əsas amillərdən birinə çevrilib. Bu baxımdan Elm və Təhsil Nazirliyi, Rəqəmsal İnkişaf və Nəqliyyat Nazirliyi və OpenAI arasında qurulan əməkdaşlıq xüsusi əhəmiyyət daşıyır”, – deyə Fərid Osmanov bildirib.
Onun sözlərinə görə, əməkdaşlıq çərçivəsində 500 mindən çox şagirdi əhatə edəcək adaptiv öyrənmə platformasının yaradılması nəzərdə tutulur. Platforma tədris prosesinin daha fərdiləşdirilmiş şəkildə təşkilinə imkan yaradacaq.
Fərid Osmanov qeyd edib ki, təşəbbüs yalnız təhsil sahəsini deyil, eyni zamanda süni intellekt istiqamətində fəaliyyət göstərən tədqiqatçılar, startaplar və texnologiya icmaları üçün də yeni imkanlar açacaq.
“Əməkdaşlıq çərçivəsində nəzərdə tutulan hakatonlar, “Build Days” tədbirləri və tədqiqat təşəbbüsləri xüsusi önəm daşıyır”, – deyə o vurğulayıb.
IDDA rəhbəri əlavə edib ki, layihə “Azərbaycan Respublikasında rəqəmsal inkişafın sürətləndirilməsinə dair 2026–2028-ci illər üçün Fəaliyyət Planı”na uyğun şəkildə həyata keçiriləcək.
“Əminəm ki, bu təşəbbüs ölkəmizdə süni intellektin daha geniş tətbiqinə, innovativ məhsul və xidmətlərin yaranmasına, eləcə də Azərbaycanın regionun aparıcı süni intellekt mərkəzlərindən biri kimi mövqeyinin güclənməsinə mühüm töhfə verəcək”, – deyə Fərid Osmanov bildirib