İyun ayının əvvəlində ABŞ-ın beş aparıcı bankı – Bank of America, Citi, Deutsche Bank, Goldman Sachs və UBS – investorlar üçün vacib proqnozlarını açıqlayıb.
GDP xəbər verir ki,qiymətləndirmələrdə süni intellekt (AI) bazarında həddindən artıq qızma, tokenizasiyanın partlayışlı böyüməsi və fond bazarının kövrəkliyi vurğulanır.
Bank of America xəbərdarlıq edir ki, AI sektorunda “qızma” müşahidə olunur. Amazon, Google, Meta, Microsoft və Oracle bu il AI infrastrukturuna təxminən 725 milyard dollar xərcləyəcək. Bu isə texnoloji nəhənglərin sərbəst pul axınını aşağı sala bilər. Bankın analitikləri hazırda çip və avadanlıq istehsalçılarını daha maraqlı hesab edirlər.
Citi isə irəliyə baxır: banka görə, tokenləşdirilmiş aktivlərin həcmi 2030-cu ilə qədər cəmi 17 milyard dollardan 5,5 trilyon dollara çata bilər. Əsas artım dövlət istiqrazları, səhmlər və stebleycoinlər hesabına olacaq. Proqnozun aşağı həddi 2,7 trilyon, yuxarı həddi isə 8,2 trilyon dollardır.
Deutsche Bank öz hədəfini dəyişməyib: S&P 500 indeksi 2026-cı ilin sonuna qədər 8,000 bəndə çatmalıdır. Lakin bank vurğulayır ki, bazar AI ilə bağlı istənilən şübhəyə həddən artıq həssas reaksiya verir – bu risk yaradır.
Goldman Sachs Cənubi Koreyanın KOSPI indeksi üzrə 12 aylıq hədəfini 12,000 bəndə (+40%) qaldırıb. Bank AI-nin yaddaş (memory) çipləri sahəsində superdövrünə inanır. Qeyd olunur ki, Samsung və SK Hynix indeksin təxminən yarısını təşkil edir. Koreya şirkətlərinin mənfəəti isə 2026-cı ildə 320% arta bilər.
UBS konkret hədəf verməsə də, özünün “Turbu-lens” adlı göstəricisini açıqlayıb. Göstərici 0,8 səviyyəsinə yüksəlib (maksimum stress riski 1-dir). Bank düşüş proqnozu vermir, lakin xəbərdarlıq edir: əgər bazar enməyə başlasa, bu, çox kəskin ola bilər.
Xülasə. Böyük bankların iyun proqnozları göstərir ki, investorlar həm böyük fürsətlər (tokenizasiya, Koreya çip istehsalçıları), həm də ciddi risklər (AI-da şişkinlik, bazarın kövrəkliyi) ilə üz-üzədir. Analitiklər ehtiyatlı olmağa çağırırlar.