İqtisadiyyat Nazirliyi yanında Dövlət Vergi Xidməti ölkədə yeni nəsil nəzarət-kassa aparatlarının (NKA) tətbiqini genişləndirmək istiqamətində tədbirləri davam etdirir.
Qurumun məlumatına görə, indiyədək ölkə üzrə 115 min 289 ədəd yeni nəsil NKA quraşdırılıb. Bu cihazların tətbiqi hesablaşmaların daha şəffaf şəkildə aparılmasına, malların qanunsuz dövriyyəsinin qarşısının alınmasına və ticarət əməliyyatları üzərində nəzarətin gücləndirilməsinə imkan yaradıb.
Bildirilib ki, 2026-cı ilin yanvar–iyul aylarında yeni nəsil NKA-lar vasitəsilə qeydə alınan dövriyyənin həcmi 17 milyard 588,4 milyon manata çatıb. Bu göstərici ötən ilin müvafiq dövrü ilə müqayisədə 2 milyard 255,7 milyon manat və ya 14,7 faiz çoxdur.
Dövlət Vergi Xidməti hesab edir ki, yeni nəsil nəzarət-kassa aparatlarının tətbiqinin genişləndirilməsi kölgə iqtisadiyyatının həcminin azaldılmasına, vergi intizamının gücləndirilməsinə və sahibkarlıq fəaliyyətində şəffaflığın artırılmasına töhfə verir.