SOCAR 2025-ci ili əsas maliyyə göstəricilərində artımla başa vurub. Şirkətin əməliyyat fəaliyyətindən mənfəəti əvvəlki illə müqayisədə 80% artaraq 5,2 milyard manata çatıb.
GDP xəbər verir ki, SOCAR-ın 2025-ci il üzrə maliyyə göstəricilərinə əsasən, şirkətin il ərzində gəlirləri 86,3 milyard manat, ümumi mənfəəti isə 12,6 milyard manat təşkil edib. Hesabat dövründə xalis mənfəət təxminən 3 milyard manat olub.
Şirkətin faizlər, vergilər və amortizasiyadan əvvəl mənfəəti (EBITDA) 2025-ci ildə 10,9 milyard manata çatıb. Bu göstərici 2024-cü illə müqayisədə 26% artıb. SOCAR-ın gəlirlərinin əsas hissəsi xam neft, neft və kimya məhsulları, eləcə də təbii qazın satışından formalaşıb.
Əməliyyat fəaliyyətinin nəticələrinin yaxşılaşması şirkətin pul vəsaitlərinin hərəkətində də özünü göstərib. Belə ki, əməliyyat fəaliyyəti nəticəsində yaranan pul vəsaitlərinin hərəkəti ötən illə müqayisədə 136% artıb.
2025-ci ildə SOCAR beynəlxalq aktivlər portfelinin genişləndirilməsi və enerji dəyər zəncirində mövqeyinin gücləndirilməsi istiqamətində bir sıra strateji əməliyyatlar həyata keçirib. Bunlara “Bahar” və “Qum-Dəniz” yataqlarında 80%-lik payın alınması, İsrailin Aralıq dənizi hövzəsində yerləşən “Tamar” qaz yatağında 10% effektiv iştirak payının əldə edilməsi, Türkiyədə yeni neft-kimya və enerji layihələrinin inkişafı, rəqəmsal infrastruktur və petrokimya sahələrinə strateji investisiyalar daxildir.
Bununla yanaşı, şirkət qaz ixracının və beynəlxalq tərəfdaşlıqların genişləndirilməsi istiqamətində fəaliyyətini davam etdirib. SOCAR bildirir ki, əməliyyat səmərəliliyinin artırılması və xərclərin optimallaşdırılması üzrə tədbirlər də maliyyə nəticələrinə müsbət təsir göstərib.
2025-ci ildə SOCAR tərəfindən dövlətə dividendlər, dövlətə ayırmalar, vergilər və sosial xərclər şəklində ümumilikdə 3,8 milyard manat ödəniş edilib. 2021–2025-ci illər ərzində isə bu ödənişlərin məcmu həcmi 15,9 milyard manata çatıb.
Eyni dövrdə dövlət tərəfindən SOCAR-a ümumilikdə 1,6 milyard manat vəsait yatırılıb. Beləliklə, 2021–2025-ci illərdə SOCAR-ın dövlətə müxtəlif istiqamətlər üzrə ödənişlərinin həcmi dövlət tərəfindən şirkətə yatırılan vəsaitdən təxminən 10 dəfə çox olub.
SOCAR Azərbaycanın ən iri vergi ödəyicilərindən və işəgötürənlərindən biri kimi ölkənin sosial-iqtisadi inkişafında mühüm rol oynayır. Şirkətin investisiya və sosial layihələri iqtisadiyyatın şaxələndirilməsi və insan kapitalının inkişafına töhfə verir.
Qeyd edək ki, SOCAR-ın 31 dekabr 2025-ci il tarixinə konsolidasiya edilmiş maliyyə hesabatına beynəlxalq audit şirkəti “Ernst & Young Holdings (CIS) B.V.” tərəfindən dəyişilməmiş (təmiz) auditor rəyi verilib.