QR kodun ödəniş aləti kimi ekosistemdə öz mövqeyini qoruması üçün ödəniş infrastrukturunun daha əlçatan olması vacibdir.
GDP xəbər verir ki, bu fikri Azərbaycan Banklar Assosiasiyasının (ABA) “Ödəniş sistemləri və rəqəmsal bankçılıq üzrə Ekspert Qrupu”nun rəhbəri Tamerlan Rüstəmov bildirib.
Onun sözlərinə görə, müşahidələr QR kod əsaslı ödəniş infrastrukturunun kiçik biznes subyektləri üçün hazırda kifayət qədər əlçatan və əlverişli olmadığını göstərir.
Rüstəmov bu sahədə Özbəkistan və Çin təcrübəsinə diqqət çəkib. O qeyd edib ki, həmin ölkələrdə QR kod ödəniş vasitəsi kimi geniş yayılıb və müxtəlif subyektlər, hətta gündəlik yaşayış üçün yardım yığan şəxslər tərəfindən belə istifadə olunur.
Mütəxəssis hesab edir ki, QR ödənişlərinin tətbiqində dinamik QR kodlarla yanaşı, statik QR kodlardan istifadənin də təmin edilməsi məqsədəuyğundur.
Rüstəmovun fikrincə, belə yanaşma QR kod əsaslı ödənişlərin daha geniş istifadəçi və biznes dairəsinə çatmasına, ödəniş infrastrukturunun əlçatanlığının artmasına imkan yarada bilər.