“Amazon”un təsisçisi Ceff Bezos hesab edir ki, süni intellektin (AI) inkişafı gələcəkdə iş həftəsinin üç günə qədər azalmasına və ailələrin yalnız bir nəfərin maaşı ilə dolanmasına imkan yarada bilər.
GDP.AZ xəbər verir ki, milyarder bu barədə “Fox News” telekanalına müsahibəsində bildirib.
Bezosun sözlərinə görə, süni intellekt hesabına əmək məhsuldarlığının artması insanların daha az işləyərək ailələrini maddi cəhətdən təmin etməsinə şərait yarada bilər.
O qeyd edib ki, texnologiyanın inkişafı nəticəsində bəzi ailələrdə hər iki şəxsin işləməsinə ehtiyac qalmaya bilər.
“Amazon”un təsisçisi süni intellektin kütləvi işsizliyə səbəb olacağı ilə bağlı narahatlıqları bölüşmədiyini bildirib. Onun fikrincə, avtomatlaşdırma iqtisadiyyatda yeni imkanlar yaradacaq və əmək bazarını dəyişdirəcək.
Bununla belə, ekspertlərin diqqət çəkdiyi əsas məsələlərdən biri texnoloji inkişafdan əldə olunan iqtisadi faydaların işçilər və şirkətlər arasında necə bölüşdürüləcəyidir.
Qeyd edək ki, Bezosun açıqlaması proqnoz xarakteri daşıyır və üçgünlük iş həftəsinə keçidlə bağlı konkret müddət nəzərdə tutmur.