“Azərbaycan 2030: sosial-iqtisadi inkişafa dair Milli Prioritetlər” çərçivəsində rəqabətqabiliyyətli insan kapitalının və müasir innovasiya mühitinin formalaşdırılması əsas hədəflərdən biridir.
GDP xəbər verir ki, bunu iqtisadiyyat nazirinin müavini Azər Bayramov “Enterprise Azerbaijan” portalının “Demo Day” tədbirində çıxışı zamanı bildirib.
Onun sözlərinə görə, bu hədəflərə uyğun olaraq son illərdə innovasiya və rəqəmsal inkişaf sahəsində vahid strateji çərçivə yaradılıb.
Nazir müavini bildirib ki, startapların inkişafı üçün əlverişli investisiya mühitinin yaradılmasına, rəqabətqabiliyyətli ekosistemin formalaşdırılmasına və alternativ maliyyələşmə imkanlarının genişləndirilməsinə xüsusi diqqət yetirilir.
A.Bayramov qeyd edib ki, ölkədə özəl vençur kapitalı ekosistemi formalaşır. “Sabah” vençur fondu və “Sabah Angels” kimi təşəbbüslər texnologiya startaplarının inkişafına və yeni investorların formalaşmasına dəstək verir.
O vurğulayıb ki, innovasiyalara əsaslanan iqtisadiyyatın inkişafında dövlət, biznes və ekspertlər arasında tərəfdaşlıq həlledici əhəmiyyət daşıyır.