Qazaxıstana səfər çərçivəsində yeni “Xəzər körpüsü” (“Super Ferry”) Transxəzər bərə sisteminin yaradılması üzrə strateji əməkdaşlığın əsas istiqamətlərini müəyyən edən əməkdaşlıq müqaviləsi imzalanıb.
GDP xəbər verir ki, bu barədə AZCON Holding-in baş icraçı direktoru Şahin Babayev məlumat verib.
O bildirib ki, səfər zamanı “Samruk-Kazyna” Milli Rifah Fondunun İdarə Heyətinin sədri Nurlan Jakupovun rəhbərlik etdiyi nümayəndə heyəti ilə görüş keçirilib.
Görüş çərçivəsində Bakı Beynəlxalq Dəniz Limanının ərazisində intermodal yük terminalının yaradılması istiqamətində əməkdaşlığın prinsiplərini müəyyən edən əsas şərtlər sənədi də imzalanıb.
Tərəflər korporativ idarəetmə və portfel şirkətləri arasında koordinasiya sahəsində təcrübə mübadiləsi aparıblar. Həmçinin Orta Dəhliz, dibdərinləşdirmə işləri və dəniz infrastrukturu layihələri üzrə əməkdaşlıq imkanları müzakirə olunub.
