ABŞ, Azərbaycan və Ermənistan “Beynəlxalq Sülh və Rifah naminə Tramp Marşrutu” (TRIPP) layihəsinin həyata keçirilməsi məqsədilə birgə texniki işçi qrupu formalaşdırıb.
GDP xəbər verir ki, bu barədə ABŞ Dövlət Departamentinin mətbuat xidməti məlumat yayıb.
Bildirilib ki, tərəflər layihənin praktiki icrası və müvafiq infrastrukturun yaradılması istiqamətində əməkdaşlığı davam etdirirlər.
Xatırladaq ki, 2025-ci ilin avqustunda üç ölkə arasında TRIPP layihəsi üzrə işlərə başlanılmasını nəzərdə tutan bəyannamə imzalanıb.
Layihə Azərbaycanın əsas hissəsi ilə Naxçıvan Muxtar Respublikası arasında Ermənistan ərazisindən keçən birbaşa nəqliyyat bağlantısının yaradılmasını və Türkiyəyə çıxışın təmin edilməsini nəzərdə tutur.
Ümumi uzunluğu 42 kilometr olan marşrut çərçivəsində avtomobil və dəmir yolu infrastrukturunun, eləcə də enerji kommunikasiya xətlərinin qurulması planlaşdırılır.
Ermənistanın xarici işlər naziri Ararat Mirzoyan daha əvvəl açıqlamasında layihə üzrə tikinti işlərinə 2027-ci ilin əvvəlində başlanılmasının mümkün olduğunu bildirib.
Qeyd edək ki, ilkin planlara əsasən, TRIPP layihəsinin icrasına 2026-cı ilin ikinci yarısında başlanılması nəzərdə tutulurdu.
TRIPP layihəsinin reallaşdırılması regionda nəqliyyat və logistika əlaqələrinin genişləndirilməsi, tranzit imkanlarının artırılması və regional iqtisadi inteqrasiyanın gücləndirilməsi baxımından mühüm əhəmiyyət daşıya bilər.**