““Ödəniş xidmətləri və ödəniş sistemləri haqqında” Azərbaycan Respublikası Qanununun 7.1.1-ci maddəsinə əsasən elektron pul təşkilatı ödəniş əməliyyatlarının aparılması məqsədilə ödəniş xidməti istifadəçilərindən qəbul edilmiş pul vəsaitinin təhlükəsizliyini təmin etmək üçün bu pul vəsaitini alındığı günün növbəti iş günündən gec olmayaraq vəsait alana və ya hər hansı ödəniş xidməti təchizatçısına köçürmədiyi təqdirdə, Azərbaycan Respublikasında fəaliyyət göstərən banklarda hesabda saxlaya bilər.”
GDP xəbər verir ki, bunu Banklar Mərkəzi Bankın operatoru olduğu ödəniş sistemlərində fintexləri təmsil etməsi mexanizminə aydınlıq gətirərkən Azərbaycan Banklar Assosiasiyasının nəzdindəki “Ödəniş sistemləri və rəqəmsal bankçılıq üzrə Ekspert Qrupu”nun sədri Tamerlan Rüstəmov deyib.
O bildirib: “Bank olmayan ödəniş xidməti təchizatçılarında xidmət olunan ödəniş xidməti istifadəçilərinin Mərkəzi Bankın operatoru olduğu ödəniş sistemlərində, o cümlədən Ani Ödənişlər Sistemində ödəniş əməliyyatları banklar vasitəsilə emal edilə bilər. Beynəlxalq təcrübəyə əsasən bu halda banklar ödəniş sistemində birbaşa iştirakçı olaraq çıxış edirlər.”
Tamerlan Rüstəmov əlavə edib: “Elektron pul təşkilatları Ani Ödənişlər Sistemi və digər ödəniş sistemləri üzərindən ödəniş əməliyyatlarının aparılması üçün ödəniş xidməti istifaədçilərinə açdıqları ödəniş hesablarına IBAN təyin etməlidirlər. Məhz standard bank hesab nömrəsi olan IBAN əsasında ödəniş xidməti isitfadəçiləri digər ödəniş xidməti təchizatçılaRINda xidmət olunan şəxslərlə qarşılıqlı hesablaşmaları həyata keçirə biləcəklər.”
Tamerlan Rüstəmov fikirlərini tamamlayarkən qeyd edib: “Bu halda, banklar IBAN üzərindən aparılacaq ödəniş əməliyyatlarının emalı, ötürülməsi və toplanması, prosesinin daha səmərəli formada təşkil edilməsi məqsədilə elektron pul təşkilatının avtomatlaşdırılmış informasiya sistemləri ilə inteqrasiyanın təşkilini diqqətdə saxlamalıdır. Bu inteqrasiyanın təhlükəsiz və effektiv formada təşkili fintexlərin fəaliyyətini daha səmərəli formada təşkil etməklə banklar üçün yeni müştəri seqmentinin qazanılmasında mühüm rol oynayacaqdır”