Azərbaycan 2029-cu ilədək 300 müəssisəni rəqəmsal transformasiya proqramlarına cəlb etməyi planlaşdırır.
GDP xəbər verir ki, bu barədə İqtisadiyyat Nazirliyinin tabeliyində fəaliyyət göstərən Dördüncü Sənaye İnqilabının Təhlili və Koordinasiya Mərkəzinin (4SİM) icraçı direktoru Fəriz Cəfərov Dünya İqtisadi Forumunun Dördüncü Sənaye İnqilabı Mərkəzləri Şəbəkəsi çərçivəsində milli proqramların formalaşdırılmasına həsr olunmuş onlayn görüşdə məlumat verib.
F.Cəfərov “Azərbaycan Respublikasının 2026–2029-cu illər üçün Rəqəmsal İqtisadiyyatın İnkişafı Strategiyası” barədə danışaraq bildirib ki, sənəd 9 prioritet istiqamət və 50 təşəbbüsü əhatə edir. Strategiyanın əsas məqsədi biznes, cəmiyyət və dövlət sektorunda rəqəmsal transformasiyanı sürətləndirmək, rəqəmsal bacarıqları inkişaf etdirmək və məlumatlara əsaslanan idarəetməni təşviq etməkdir.
Görüşdə Azərbaycanda Sənaye 4.0 ekosisteminin yaradılması istiqamətində görülən işlər də təqdim olunub. Bildirilib ki, bu təşəbbüs müəssisələrin texnoloji və “yaşıl” transformasiyasının dəstəklənməsinə, insan kapitalının inkişafına və yeni texnologiyaların tətbiqinə yönəlib.
Strategiya çərçivəsində 2029-cu ilədək 300 müəssisənin rəqəmsal transformasiya proqramlarına cəlb edilməsi, 250 sahəvi startapın yaradılması və 200 kiçik və orta sahibkarlıq subyektinin (KOB) rəqəmsal bazarlara çıxışının təmin olunması nəzərdə tutulur. Eyni zamanda, 40 min vətəndaşın ixtisaslaşmış təlim proqramlarına cəlb edilməsi planlaşdırılır.
Onlayn görüşdə şəbəkəyə daxil olan 24 mərkəzin rəhbərləri, həmçinin Dünya İqtisadi Forumunun Qabaqcıl Texnologiyalar və İnnovasiyalar Mərkəzinin Strateji Təsir üzrə rəhbəri Manju Corc iştirak edib. Azərbaycanla yanaşı, Ruanda və Malayziyanın Dördüncü Sənaye İnqilabı mərkəzləri də öz təcrübələrini bölüşüblər.
Tədbir zamanı milli proqramların hazırlanmasına effektiv dəstəyin göstərilməsi, maraqlı tərəflərlə əməkdaşlıq, uğurlu yanaşmaların tətbiqi və mövcud çağırışların həlli ilə bağlı fikir mübadiləsi aparılıb.