Azərbaycan kibertəhlükəsizlik sahəsində əhəmiyyətli uğur qazanaraq Milli Kibertəhlükəsizlik İndeksində (NCSI) 52-ci yerdən 31-ci sıraya yüksəlib. “e-Governance Academy” tərəfindən hazırlanan indeksdə ölkəmizin göstəricisi 75,83 baldan 83,33 bala çatıb.
GDP xəbər verir ki, 100-dən çox ölkəni əhatə edən NCSI kibertəhlükəsizlik sahəsində ən etibarlı beynəlxalq ölçmə alətlərindən biri hesab olunur. İndeks yalnız texniki imkanları deyil, həm də hüquqi çərçivəni, idarəetmə qabiliyyətini və milli hazırlıq səviyyəsini qiymətləndirir.
12 əsas sahə və 49 indikator üzrə aparılan qiymətləndirmə göstərir ki, Azərbaycan kibertəhlükələrə operativ müdaxilə, milli siyasətin formalaşdırılması, institusional imkanlar və beynəlxalq əməkdaşlıq istiqamətlərində nəzərəçarpan irəliləyiş əldə edib.
Bu uğur məqsədyönlü dövlət siyasətinin, kibertəhlükəsizlik, rəqəmsal iqtisadiyyat və elektron idarəetmənin gücləndirilməsinə yönələn strateji qərarların nəticəsidir. Dövlət investisiyaları, mütəxəssis hazırlığına ayrılan diqqət və kritik informasiya infrastrukturunun qorunması üzrə kompleks tədbirlər ölkənin bu sahədəki mövqeyini köklü şəkildə dəyişib.
Son illərdə milli qanunvericiliyin təkmilləşdirilməsi, ixtisaslaşmış qurumların yaradılması və beynəlxalq tərəfdaşlıqların genişləndirilməsi də nailiyyəti şərtləndirən əsas amillər sırasındadır.
