İnvestisiya şirkətlərinin 2024-cü ilin yalvar -oktyabr ayları ərzində olan dövriyyəsinə görə renkinqinin təhlili göstərir ki, ən yüksək dövriyyəyə malik olan şirkət “ABB İnvest İnvestisiya Şirkəti”dir.
GDP xəbər verir ki, bu barədə Bakı Fond Birjasında ticarət olunan bazarlar üzrə birja üzvlərinin dövriyyələri ilə bağlı aylıq hesabatda məlumat verilib.
Bu şirkətin dövriyyəsi təxminən 40 milyard manata yaxındır ki, bu da ikinci yerdə qərarlaşan “PAŞA Kapital İnvestisiya Şirkəti”nin dövriyyəsindən (21.5 milyard manat) təqribən 2 dəfə çoxdur.
Üçüncü yerdə qərarlaşan “Assist Finance İnvestisiya şirkəti”nin dövriyyəsi 5.2 milyard manat təşkil edir ki, bu da ilk iki yerdə olan şirkətlərlə müqayisədə əhəmiyyətli dərəcədə azdır.
Dördüncü və beşinci yerlərdə müvafiq olaraq “Unicapital İnvestisiya Şirkəti” (3 milyard manat) və “CPM-İnvest İnvestisiya Şirkəti” (2.7 milyard manat) qərarlaşıb.
“AzFinance İnvestisiya Şirkəti” 2.3 milyard manat dövriyyə ilə altıncı yerdədir.
Yeddinci sırada olan “İnvest-Az İnvestisiya Şirkəti” 1 milyard manatdan bir qədər çox dövriyyəyə malikdir.
Səkkizinci yerdə qərarlaşan “Capital Partners İnvestisiya Şirkəti”nin dövriyyəsi 840 milyon manat civarındadır.
Doqquzuncu sırada olan “MFX Trading İnvestisiya Şirkəti”nin dövriyyəsi 532 milyon manat təşkil edir.
“Xalq Kapital İnvestisiya Şirkəti” 290 milyon manat dövriyyə ilə onuncu yerdə qərarlaşıb.
On birinci yerdə olan “PSG Kapital İnvestisiya Şirkəti”nin dövriyyəsi 162 milyon manat təşkil edir.
Siyahıda sonuncu yerdə qərarlaşan “Troni İnvestisiya Şirkəti”nin dövriyyəsi isə cəmi 4.4 milyon manat təşkil edir ki, bu da siyahının liderindən təxminən 9000 dəfə azdır.
Bu renkinq göstərir ki, Azərbaycanın investisiya şirkətləri bazarında əhəmiyyətli dərəcədə konsentrasiya mövcuddur və ilk iki şirkətin dövriyyəsi digər bütün şirkətlərin ümumi dövriyyəsindən daha çoxdur.
