İnnovasiya və Rəqəmsal İnkişaf Agentliyinin Rəqəmsal məhsulların inkişafı departamentinin müdiri Emil Rüstəmov Çinin Sian şəhərində keçirilən “Digital Silk Road” tədbirində iştirak edib.
Emil Rüstəmov bildirib ki, İRİA rəhbərliyinin etimadı ilə Rəqəmsal İnkişaf və Nəqliyyat Nazirliyini beynəlxalq tədbirdə təmsil etmək üçün dəvət alıb.
World Internet Conference tərəfindən təşkil olunan tədbir tarixi İpək Yolunun başlanğıc nöqtəsi hesab edilən Sian şəhərində keçirilib.
Tədbirdə Çin Kommunist Partiyasının və müxtəlif dövlətlərin yüksək vəzifəli nümayəndələri də iştirak edərək çıxışlar ediblər.
Konfrans çərçivəsində süni intellekt agentlərinin inkişafı və rəqəmsallaşmanın müxtəlif sahələrdə tətbiqi müzakirə edilib. Bu müzakirələrin davamı olaraq, süni intellektə əsaslanan rəqəmsal ticarət, transsərhəd elektron kommersiya, məlumatların idarə edilməsi, eləcə də kiçik və orta sahibkarlığın rəqəmsal imkanlardan istifadəsinə dövlət dəstəyi və təşviqi diqqət mərkəzində olub.
Mədəni irsin rəqəmsallaşdırılması, müəllif hüquqlarının qorunması və rəqəmsal texnologiyalar vasitəsilə tarixi-mədəni irsin təbliği də proqramın əsas mövzuları sırasında yer alıb.
“Digital Silk Road” tədbiri müxtəlif ölkələrin dövlət, texnologiya və biznes nümayəndələrini bir araya gətirərək rəqəmsal əməkdaşlıq, innovasiya və texnologiyaların qlobal inkişaf perspektivlərinin müzakirəsi üçün platforma rolunu oynayır.
Müxtəlif:Aynur Qəniyeva