Bərdə rayonunda dəyəri 1500 manat olan bir baş iribuynuzlu heyvanın bir il müddətinə sığortalanması fermerə 36 manata, 10 baş mal-qaranın sığortalanması isə 360 manata başa gəlir.
Qış mövsümünün yaxınlaşması heyvandarlıq təsərrüfatlarında müxtəlif riskləri artırır. Soyuq havalarda istifadə olunan qızdırıcıların səbəb ola biləcəyi yanğınlar, eləcə də vəhşi heyvanların hücumları fermerlərə ciddi maddi ziyan vura bilər.
Bu risklərdən qorunmaq üçün fermerlər Aqrar Sığorta Fondu vasitəsilə iribuynuzlu və xırdabuynuzlu heyvanlarını dövlət dəstəyi ilə sığortalaya bilərlər. Mövcud mexanizmə əsasən, sığorta haqqının 50 faizini dövlət qarşılayır.
İribuynuzlu heyvanların sayına görə ölkənin aparıcı rayonlarından olan Bərdədə 110 mindən çox iribuynuzlu heyvan saxlanılır.
Bərdədə dəyəri 1500 manat olan bir baş iribuynuzlu heyvanın illik sığorta haqqı 72 manat təşkil edir. Bunun 36 manatı dövlət tərəfindən ödənildiyindən fermerin illik xərci cəmi 36 manat, aylıq hesabla isə 3 manat olur.
Beləliklə, ümumi dəyəri 15 min manat olan 10 baş iribuynuzlu heyvanın bir illik sığortalanması fermerə 360 manata başa gəlir.
Aqrar sığorta heyvanları təbii fəlakətlər, yoluxucu xəstəliklər, yanğın, ot və yemdən zəhərlənmə, ilan və həşərat sancmaları, vəhşi heyvanların hücumları, üçüncü şəxslərin hərəkətləri və digər sığorta risklərindən qoruyur.
Sığorta hadisəsi baş verdikdə müqavilədə nəzərdə tutulan 10 faizlik azadolma məbləği tətbiq edilir. Məsələn, sığorta dəyəri 1500 manat olan heyvan tələf olarsa, 150 manat çıxıldıqdan sonra fermerə 1350 manat sığorta ödənişi verilə bilər.
Bu isə o deməkdir ki, 10 baş mal-qaranın sığortalanmasına 360 manat xərcləyən fermer, sığorta hadisəsi nəticəsində bir heyvanını itirdikdə belə, ödədiyi illik sığorta haqqının 3,75 misli həcmində kompensasiya ala bilər.