PAŞA Bank ilə Türk Hava Yolları arasında Miles&Smiles birgə markalı kart üzrə 3 illik yeni əməkdaşlıq müqaviləsinin imzalanma mərasimi keçirilib.
GDP xəbər verir ki, tədbirdə çıxış edən PAŞA Bankın İdarə Heyəti sədrinin müavini Bəhruz Nağıyev tərəfdaşlığın 7 illik statistikasını açıqlayıb və strateji hədəfləri bölüşüb.
Nağıyev bildirib ki, 2019-cu ildə start götürən bu layihə hazırda 29 mindən çox kart istifadəçisinə xidmət göstərir. Tərəfdaş şəbəkəsinin 200-ə çatdığını vurğulayan Nağıyev, bunun 700-ə yaxın brendin Azərbaycan bazarında müştərilər üçün əlçatan olması demək olduğunu qeyd edib. Diqqətçəkən rəqəmlərdən biri də yığılmış millərin istifadəsidir – bu müddət ərzində müştərilər 84 minə yaxın bilet məhz millər vasitəsilə sifariş ediblər.
Çıxışında bu kartın sadəcə adi ödəniş aləti olmadığını, insanların dünyanı görmək, müxtəlif kulturaları tanımaq xəyallarını gerçəkləşdirən bir vasitə olduğunu qeyd edən Bəhruz Nağıyev gələcək hədəflərə də toxunub: “İnancım odur ki, qarşıdakı 3 il ərzində biz 29 minlik kart bazasını 50 minə çatdıra bilərik. Bizim potensialımız buna var. Çalışırıq ki, partnyor şəbəkəmizi genişləndirək və müştərilər üçün ən məntiqli seçim məhz PAŞA Bankın Miles&Smiles kartı olsun.”
O, həmçinin bu ilin iyun ayında ölkədə ilk dəfə olaraq balansda qalan vəsaitə mil qazanılması imkanının təqdim edildiyini xatırladıb.
Qeyd edək ki, mərasimdə Türk Hava Yollarının marketinq üzrə baş vitse-prezidenti Ömər Faruq Sönəz də çıxış edərək qlobal Miles&Smiles proqramının 25 milyondan çox üzvü olduğunu, Türk Hava Yollarının isə 130-dan çox ölkədə 540-dan çox təyyarə ilə uçuşlar həyata keçirdiyini bildirib. Tədbirin yekununda tərəflər 3 illik yeni memorandumu rəsmi olaraq imzalayıblar.
Müəllif: Aynur Qəniyeva