PAŞA Bank süni intellekt texnologiyalarına diqqəti artıracaq və bu istiqamət bankın növbəti strateji dövründə xüsusi sahələrdən biri olacaq.
Bunu bankın İdarə Heyəti sədrinin müavini Bəhruz Nağıyev GDP-yə eksklüziv açıqlamasında bildirib.
Onun sözlərinə görə, süni intellekt artıq maliyyə və qeyri-maliyyə təşkilatlarının diqqət ayırmalı olduğu sahələrdən biridir.
“Təbii ki, əlbəttə. Yəni bu bir növ, necə deyərlər, gigiyenadır artıq. Yəni bu fikirləşmə mövqeyi deyil. Hər bir təşkilat — maliyyə və ya qeyri-maliyyə təşkilatı — təbii ki, bu sahəyə diqqət ayırır”, – B.Nağıyev deyib.
O bildirib ki, PAŞA Bank daha məhsuldar və effektiv fəaliyyət göstərmək üçün mövcud süni intellekt məhsullarının, eləcə də ümumilikdə texnologiyanın təqdim etdiyi imkanlardan istifadə etməyi nəzərdə tutur.
“Növbəti strateji dövrdə də xüsusi bir istiqamətdir. Bunun fonunda da işlər olacaq”, – bank rəsmisi əlavə edib.
Süni intellekt istiqamətinə ayrılması nəzərdə tutulan vəsaitin həcminə gəlincə, B.Nağıyev hazırda konkret məbləğ açıqlamağın düzgün olmadığını bildirib.
Onun sözlərinə görə, büdcədə müəyyən məbləğin nəzərdə tutulması həmin vəsaitin faktiki olaraq tam xərclənəcəyi anlamına gəlmir.
“Ümumi siz büdcə qoya bilərsiniz, amma o demək deyil ki, bu reallaşacaq. Biz reallaşan rəqəmlər üzərindən getməyimiz daha yaxşı olar”, – o qeyd edib.
B.Nağıyev bildirib ki, növbəti altı ayın və ya ilin yekunları açıqlanarkən bu istiqamətdə hər hansı xərc formalaşarsa, həmin rəqəmlər ayrıca açıqlanacaq.
Müəllif:Aynur Qəniyeva