2026-cı ilin may ayının sonuna Azərbaycanda fəaliyyət göstərən 22 bankın cəmi aktivləri 59.18 mlrd. manata yüksəlib.
GDP Azərbaycan Mərkəzi Bankına istinadən xəbər verir ki, may ərzində bank sektorunun aktivləri 3.2%, öhdəlikləri isə 3.9% artıb.
Mayın 31-nə bank sektorunun cəmi öhdəlikləri 51.61 mlrd. manat, balans kapitalı isə 7.57 mlrd. manat təşkil edib. Hesabat dövründə bankların balans kapitalı 1.2% azalıb.
Yanvar-may aylarında banklar 557.1 mln. manat xalis mənfəət əldə edib. Bu 2025-ci ilin eyni dövründə 430.7 mln. manat idi. Eyni dövrdə sektorun əməliyyat mənfəəti 837.5 mln. manat, ödənilmiş mənfəət vergisi isə 134.7 mln. manat təşkil edib.
Bank sektorunun kredit portfeli ay ərzində 276.6 mln. manat və ya 0.9% artaraq 30.89 mlrd. manata çatıb. Kreditlərin 16.40 mlrd. manatı biznes, 9.78 mlrd. manatı istehlak, 4.71 mlrd. manatı isə ipoteka kreditlərinin payına düşüb.
Bankların öhdəliklərində əsas payı depozitlər təşkil edib. Mayın sonuna depozit portfeli 38.55 mlrd. manata çataraq ümumi öhdəliklərin 74.7%-ni formalaşdırıb. Bunun 21.12 mlrd. manatı hüquqi şəxslərin, 17.43 mlrd. manatı isə fiziki şəxslərin depozitləri olub.
Fiziki şəxslərin əmanətlərinin 12.26 mlrd. manatı və ya 70.4%-i milli valyutada saxlanılıb. Müddətli əmanətlər fiziki şəxslərin ümumi əmanətlərinin 64.4%-ni təşkil edib. May ayında müddətli əmanətlər 235.3 mln. manat və ya 2.1% artsa da, tələbli əmanətlər 81.3 mln. manat və ya 1.3% azalıb.
May ayında bank sektoru üzrə unikal müddətli əmanətçilərin sayı əvvəlki ayla müqayisədə 3.1% və ya 6,492 nəfər artıb. İlin əvvəlindən artım isə 11.3% və ya 21,990 nəfər təşkil edib.
Bank sektorunun şəbəkəsi də geniş olaraq qalır. Mayın sonuna bankların 499 filialı, 84 şöbəsi və 3,502 ATM-i fəaliyyət göstərib. Sektorda çalışanların sayı isə 27,374 nəfər olub.