Cari ilin 2-ci rübün sonuna Azərbaycanda fəaliyyət göstərən 22 bankın filiallarının sayı əvvəlki ilin eyni dövrü ilə müqayisədə artıb.
GDP xəbər verir ki, bu barədə Azərbaycan Respublikasının Mərkəzi Bankı məlumat yayımlayıb.
Məlumata görə, hesabat tarixinə bankların filial şəbəkəsi 504 təşkil edib ki, bu da 30 iyun 2025-ci il ilə müqayisədə 8 filial və ya 1,6 faiz çoxdur.
Müqayisə olunan dövrdə bankların şöbələrinin sayında isə azalma qeydə alınıb. 2026-cı il iyunun 30-na şöbələrin sayı 83 olub. Bu göstərici ötən ilin eyni dövründəki 86 şöbə ilə müqayisədə 3 vahid və ya 3,5 faiz azalıb.
Bank infrastrukturunun əsas göstəricilərindən biri olan bankomatların (ATM) sayında isə artım müşahidə olunub. Belə ki, 30 iyun 2026-cı il tarixinə ölkə üzrə fəaliyyət göstərən ATM-lərin sayı 3 503-ə çatıb. Bu, 2025-ci ilin eyni dövrü ilə müqayisədə 148 ATM və ya 4,4 faiz artım deməkdir.
Bank sektorunda çalışanların sayında da müsbət dinamika qeydə alınıb. Hesabat tarixinə bank əməkdaşlarının sayı 27 462 nəfər təşkil edib. Bu göstərici ötən ilin iyunun 30-u ilə müqayisədə 1 391 nəfər və ya 5,3 faiz artıb. 2025-ci ilin eyni dövründə bank sektorunda çalışanların sayı 26 071 nəfər olub.
Ümumilikdə, 2026-cı ilin ilk yarısının sonuna bank sektorunda filial və ATM şəbəkəsinin genişlənməsi, eləcə də məşğulluq səviyyəsinin yüksəlməsi müşahidə edilib. Bununla yanaşı, bank şöbələrinin sayında azalma sektorun xidmət modelində rəqəmsallaşma və alternativ xidmət kanallarının genişlənməsi fonunda struktur dəyişikliklərinin davam etdiyini göstərir.