İyunun 29-da Azərbaycanın Birinci vitse-prezidenti Mehriban Əliyevanın sədrliyi ilə Azərbaycan Respublikasının Rəqəmsal İnkişaf Şurasının ilk iclası keçirilib.
GDP xəbər verir ki, Birinci vitse-prezident Mehriban Əliyeva çıxışında bildirib ki, cari ilin fevral ayında Prezident İlham Əliyevin sədrliyi ilə ölkənin yeni rəqəmsal inkişaf strategiyasına həsr olunmuş müşavirə keçirilib, verilən tapşırıqlara uyğun olaraq isə “Azərbaycan Respublikasında rəqəmsal inkişafın sürətləndirilməsinə dair 2026–2028-ci illər üçün Fəaliyyət Planı” təsdiqlənib.
Onun sözlərinə görə, qarşıdakı üç il üçün rəqəmsallaşma, süni intellekt, kibertəhlükəsizlik və innovasiya ekosisteminin inkişafını əhatə edən yol xəritəsi müəyyənləşdirilib. Mehriban Əliyeva qeyd edib ki, Rəqəmsal İnkişaf Şurasının əsas vəzifəsi dövlət qurumlarının fəaliyyətinin əlaqələndirilməsi, vahid yanaşmanın formalaşdırılması və qəbul edilən qərarların vaxtında və səmərəli icrasının təmin edilməsidir.
Birinci vitse-prezident vurğulayıb ki, məqsəd yalnız yeni texnologiyaların tətbiqi deyil, eyni zamanda, iqtisadi artımın sürətləndirilməsi, innovasiya ekosisteminin inkişafı, yerli və xarici investisiyaların cəlbi, startaplara dəstəyin artırılması və daha səmərəli dövlət idarəetmə sisteminin yaradılmasıdır.
Mehriban Əliyeva süni intellektin artıq gələcəyin deyil, bu günün əsas inkişaf amillərindən birinə çevrildiyini bildirərək, bu texnologiyanın dövlət təhlükəsizliyi baxımından əhəmiyyətinin artdığını diqqətə çatdırıb. O, kibertəhlükəsizlik və informasiya təhlükəsizliyi sahəsində yaranan yeni risklərə hazır olmağın vacibliyini qeyd edib.
İclasda çıxış edən rəqəmsal inkişaf və nəqliyyat naziri Rəşad Nəbiyev məlumat verib ki, 2026–2028-ci illəri əhatə edən Fəaliyyət Planı rəqəmsallaşma, süni intellekt, innovasiya ekosistemi və kibertəhlükəsizlik istiqamətləri üzrə ümumilikdə 58 təşəbbüsü əhatə edir. Nazir bildirib ki, 40 dövlət qurumu ilə yol xəritələri hazırlanıb, onlardan 13-üartıq təsdiqlənib və ya təsdiq mərhələsindədir.
Rəşad Nəbiyev qeyd edib ki, Milli Məlumat Hövzəsinin yaradılması, dövlət informasiya sistemlərinin hökumət buluduna köçürülməsi və yeni data mərkəzinin tikintisi istiqamətində işlər davam etdirilir. O əlavə edib ki, son üç ay ərzində “mygov” platformasının istifadəçilərinin sayı 2,7 milyondan 3,5 milyona yüksəlib. Platformaya bir neçə yeni tətbiq inteqrasiya olunub, daha yeddi dövlət tətbiqinin isə ilin sonunadək istifadəyə verilməsi planlaşdırılır.
Nazir həmçinin bildirib ki, “mygov” və digər dövlət qurumlarında süni intellekt həllərinin tətbiqi genişləndirilir, virtual vətəndaş köməkçisi istifadəyə verilib. Bundan əlavə, texnoloji suverenliyi gücləndirmək məqsədilə Azərbaycan Dayanıqlılıq Klasterinin yaradılmasına başlanılıb.
Kibertəhlükəsizlik sahəsində Milli Təhlükəsizlik Əməliyyatları Mərkəzi, Milli Kiber İnsidentlərə Qarşı Mübarizə Mərkəzi və Rəqəmsal Təhqiqat Mərkəzinin yaradılması, həmçinin dövlət və özəl sektor arasında operativ məlumat mübadiləsini təmin edəcək vahid milli kibertəhlükəsizlik platformasının qurulması istiqamətində işlərin davam etdirildiyi bildirilib.
Prezidentin köməkçisi – Prezident Administrasiyasının İqtisadi məsələlər və innovativ inkişaf siyasəti şöbəsinin müdiri Şahmar Mövsümov isə rəqəmsal transformasiya sahəsində həyata keçirilən qanunvericilik islahatları barədə məlumat verib. O qeyd edib ki, Rəqəmsal İnkişaf Şurasının müəyyən etdiyi strateji prioritetlərə uyğun olaraq hüquqi tənzimləmə, rəqabətqabiliyyətli vergi mühiti, innovasiyaların maliyyələşdirilməsi, elmi-tədqiqat təşviqləri, istedadların cəlbi və kibertəhlükəsizlik sahələrini əhatə edən kompleks qanunvericilik islahatları hazırlanır. Şahmar Mövsümov vurğulayıb ki, bu təşəbbüs postsovet məkanında rəqəmsal ekosistemin inkişafı və tənzimlənməsi istiqamətində həyata keçirilən ən əhatəli islahatlardan biridir.
Elm və təhsil naziri Emin Əmrullayev isə təhsilin rəqəmsallaşdırılması istiqamətində görülən işlər barədə məlumat verərək, təhsil müəssisələrinin vahid internet şəbəkəsinə qoşulması, “Rəqəmsal məktəb” layihəsi, təhsil məlumatlarının və sənədlərinin elektronlaşdırılması istiqamətində görülən tədbirlərdən danışıb. Nazir bildirib ki, növbəti mərhələdə tədris prosesinin tam rəqəmsallaşdırılması nəzərdə tutulur.
Emin Əmrullayev, həmçinin məktəblərdə həyata keçirilən “Rəqəmsal bacarıqlar” və “STEAM Azərbaycan” layihələrinin şagirdlərin rəqəmsal kompetensiyalarının inkişafında mühüm rol oynadığını vurğulayıb.
İclas müzakirələrlə davam edib.
