“PAŞA Bank” 2026-cı ilin ilk yarısında 96,5 milyon manat xalis mənfəət əldə edib.
GDP xəbər verir ki, bankın İdarə Heyətinin sədri və baş icraçı direktoru Cavid Quliyev bildirib ki, ilin ilk altı ayı “PAŞA Bank” üçün mühüm maliyyə nəticələri və davamlı inkişaf dinamikası ilə yadda qalıb.
Onun sözlərinə görə, hesabat dövründə bankın əsas prioritetlərindən biri real sektorun maliyyələşdirilməsinin genişləndirilməsi olub. Müştərilərə verilmiş kreditlərin həcmi 5,1%, korporativ kredit portfeli isə 6,3% artıb. Qeyri-faiz gəlirlərində də 3,2% artım qeydə alınıb.
2026-cı ilin ilk yarısının yekunlarına əsasən, “PAŞA Bank”ın aktivləri 9,98 milyard manat, məcmu kapitalı 1,01 milyard manat təşkil edib. Bankın məcmu kapital adekvatlığı 23,06%, likvidliyin örtülmə əmsalı isə 213,7% səviyyəsində olub.
Cavid Quliyev qeyd edib ki, maliyyə göstəriciləri ilə yanaşı, “CustomerFirst” yanaşması çərçivəsində müştəri təcrübəsinin yaxşılaşdırılması istiqamətində də işlər davam etdirilib. Bankın NPS — müştəri məmnuniyyətini və tövsiyə etməyə hazırlığını ölçən göstəricisi ilin əvvəlindəki 65-dən 68,1-ə yüksəlib.
Bank rəhbəri həmçinin bildirib ki, publik şirkət kimi fəaliyyətin yeni mərhələsində səhmdarlar üçün davamlı dəyərin yaradılması əsas prioritetlərdən biri olaraq qalır. 2025-ci ilin nəticələri üzrə ikinci dividend ödənişinin oktyabrın ikinci yarısında həyata keçirilməsi nəzərdə tutulur. Ümumi dividend məbləğinin 53,5 milyon manat, hər səhm üzrə ödənişin isə təxminən 2,86 manat olacağı gözlənilir.
Cavid Quliyevin sözlərinə görə, ilin ikinci yarısında bank dayanıqlı böyüməni davam etdirməyi, bizneslərin inkişafına dəstəyi genişləndirməyi, müştəri təcrübəsini daha da yaxşılaşdırmağı və səhmdarlar üçün uzunmüddətli dəyər yaratmağı hədəfləyir.