Azərbaycanın qeyri-neft sektorunda sürətlə inkişaf edən sahələrdən biri olan quşçuluq üzrə istehsal göstəriciləri artmaqda davam edir. Dövlət dəstəyi, yeni investisiyalar və gücləndirilmiş nəzarət mexanizmləri sayəsində ölkə artıq süfrə və damazlıq yumurta ilə özünü tam təmin edir, quş əti istehsalında isə özünütəminat səviyyəsi 82 faizə çatıb.
Prezident İlham Əliyev kənd təsərrüfatına həsr olunmuş müşavirədə bildirib ki, hazırda ölkədə illik quş əti istehsalı 147 min ton, idxalın həcmi isə 32 min ton təşkil edir. Dövlət başçısı vurğulayıb ki, 2030-cu ilədək Azərbaycan quş əti ilə özünü tam təmin etməlidir.
Prezidentin təsdiqlədiyi “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı”nda quş əti istehsalının ən azı 30 faiz artırılması nəzərdə tutulub.
Rəsmi statistikaya əsasən, 2020-ci ildə ölkədə quş əti istehsalı 115,4 min ton olduğu halda, 2025-ci ildə bu göstərici 147 min tona yüksəlib. Beləliklə, son beş ildə istehsal 27,4 faiz artıb.
Eyni dövrdə yumurta istehsalında da əhəmiyyətli artım qeydə alınıb. Əgər 2020-ci ildə ölkədə 1 milyard 906 milyon ədəd yumurta istehsal olunmuşdusa, 2025-ci ildə bu göstərici 2 milyard 340 milyon ədədə çatıb. İxracın həcmi isə 90 milyon ədəd təşkil edib.
Azərbaycan Quş Əti, Yumurta İstehsalçıları və İxracatçıları Assosiasiyasının rəhbəri Mürvət Həsənlinin sözlərinə görə, dövlətin göstərdiyi dəstək və epizootik vəziyyətə nəzarətin gücləndirilməsi nəticəsində quşçuluq təsərrüfatlarında istehsal sabitliyi qorunub saxlanılır.
Onun sözlərinə görə, Azərbaycan Qida Təhlükəsizliyi Agentliyinin həyata keçirdiyi nəzarət tədbirləri təhlükəli xəstəliklərin ölkəyə daxil olmasının qarşısını almağa imkan verir ki, bu da istehsal həcminin ildən-ilə artmasına şərait yaradır.
M.Həsənli bildirib ki, 2025-ci ildə ölkədə 2 milyard 342,9 milyon ədəd yumurta istehsal edilib. Bu, əvvəlki illə müqayisədə 1,8 faiz çoxdur. Ötən il 12,7 milyon ədəd damazlıq və 90,4 milyon ədəd süfrə yumurtası ixrac olunub. Yumurtadan əldə edilən ixrac gəlirləri 10,6 milyon ABŞ dollarına çatıb.
Hazırda Azərbaycan quşçuluq məhsulları Birləşmiş Ərəb Əmirlikləri, Qətər, ABŞ, İraq, Qambiya, Əfqanıstan, Syerra-Leone və Almaniya da daxil olmaqla, dünyanın onadək ölkəsinə ixrac olunur. Təkcə bu ilin ilk beş ayı ərzində Birləşmiş Ərəb Əmirliklərinə 15,8 milyon ədəddən çox süfrə yumurtası göndərilib.
Assosiasiya rəhbəri qeyd edib ki, Azərbaycan Qida Təhlükəsizliyi Agentliyi ilə Çinin Baş Gömrük Administrasiyası arasında imzalanmış sazişlər yerli istehsalçılar üçün yeni imkanlar açır. Bununla da Azərbaycan dünyanın ən böyük bazarlarından biri hesab olunan Çinə quş əti və digər məhsulların ixracını genişləndirə biləcək.
M.Həsənli vurğulayıb ki, qarşıdakı illərdə həyata keçiriləcək investisiya layihələri sayəsində ölkənin quş əti ilə tam təmin olunması və gələcəkdə ixracın başlanması planlaşdırılır.